Dán artihkkalis logat goas oažžu hupmat telefovnnain vuojidettiin, ja goas bealggi sáhtát šaddat njoalostit.
Ođđajagimánu vuosttaš beaivvi rájes šattai divraset jus gávnnahalat mobiilatelefovnnain hupmame vuojidettiin.
Ovdal lei sáhkku 1700 ruvnno, dál lea 5000(!!!) ruvnno sáhkku.
Na ii dieđus álot leat sáhkku, jus doahttalat eiseválddiid njuolggadusaid goas leat lobihemiid geavaheame mobiilatelefovnna vuojidettiin ja goas it leat.
Lohpi ja ii lohpi
Lobálaš mobiilatelefovdnageavaheapmi vuojidettiin:
– Go telefovdna lea lága mielde lobálaččat sierra mobiiladoalanis dahje lea lakton biilla mobiilatelefovdnahupmánsystemii, dalle sáhttá vástidit, riŋget ja loahpahit telefovdnaságastallama.
– Dalle sáhttá maid čuojahit musihka telefovnnain, ja sihke vuolidit jiena, lonuhit musihka ja nu ain.
Goas ii leat lobálaš mobiilageavaheapmi vuojidettiin:
– Jus telefovdna lea luoitiluvvon biilastullui, dahje lea askkis, de ii leat lohpi ii vástidit ge dan telefovnna. Dat lea beroškeahttá leat go dus bealljebilttut beljiin, dahje telefovdna lea lakton biilla mobiltelefuvdnahupmánsystemii, dahje telefovnnas lea skájan alde.
– Dasa lassin ii leat lohpi čállit ii ge lohkat dieđuid telefovnnas vuojidettiin, ii ge geahččat interneahta.
Duopmu
Jus ain eahpidat goas lea lohpi ja goas ii leat lohpi.
Norgga Alimusriekti lea maid cealkán duomu mobiilatelefovdnageavaheami dáfus go biillain vuoját.
Lágas daddjo ahte ii leat lohpi «vuojidettiin» geavahit mobiilatelefovnna. Borgarting lágamánnerievttis ledje guokte duomu guoddaluvvon Alimusriektái, gos guokte olbmo ledje áššehuvvan go leaba mobiilatelefovnna geavahan vuojidettiin.
Vuosttaš áššis čuoččui dat biilavuoddji biilaráiddus, ii ge vuoddján, muhto seammás geavahii telefovnna. Nuppi áššis fas lei biilavuoddji bisánan go lei ruksesčuovga.
Goappaš áššiin dubmii Alimusriekti ahte «vuojidettiin» mearkkaša ahte go lea jođus, dahje sáhtát šaddat fáhkka vuoddját, nu go lea dilli jus ruksesčuovgga dihte leat bisánan dahje leat biilaráiddus čuožžume.
