Bearjadaga lea leamaš stuora politiijaakšuvdna Kárášjogas go politiijat leat ožžon dieđu veahkehit dearvvašvuođaossodaga viežžat muhtin olbmo.
Sihke Álttás ja Guovdageainnus leat politiijat vuoddján Kárášjohkii go leat ožžon dieđu ahte sii šaddet veahkehit dearvvašvuođaossodaga čoavdit ášši.
Politiijat leat Kárášjoga gielddas ja dáhpáhus galgá dáhpáhuvvan meahcis, olggobealde Kárášjoga márkana. Politiijaid operašuvdnaguovddážis eai muital nu ollu ášši birra vuos, muhto duođaštit ahte sii leat vearjuduvvon go leat veahkeheamen dearvvašvuođaossodaga.
– Mii leat jođus báikái sihke helikopteriin ja maid ATV-vuojániiguin. Dat lea čielga dearvvašvuođabargu, mas politiijat leat veahkeheamen, dadjá operašuvdnajođiheaddji Jannicke Silseth Eide Ávvirii.
Ii leat oktavuohta
Go Ávvir hupmá operašuvdnaguovddážiin, de ii leat sis oktavuohta olbmuin gean leat viežžamin.
– Dát dáhpáhuvvá boaittobealbáikkis, ja mii ádjánit ollet dohko nu ahte mis ii leat oktavuohta olbmuin gean birra lea sáhka. Dađi eambbo in sáhte dadjat ášši birra, dadjá Silseth Eide.
