Láhppon dievddu bearraša sávaldaga mielde almmuhit Finnmárkku politiijat dievddu nama ja gova.
Politiija oktan eaktodáhtolaš ohcanjoavkkuin ohcet Álttá suohkanis jávkan tuiskalaš stáhtaboargára.
Lea 37-jahkásaš Yannick Schütz gii lea láhppon. Son lea tuiskalaš stáhtaboargár.
– Mii eat dieđe guđe guvlui son lea mannan ja danne almmuhit ovttasráđiid bearrašiin su gova ja nama. Mii sávvat ahte soames soaitá oaidnán su ja livččii veahkkin čujuheame guđe guvlui son sáhttá mannan. Lea stuora guovlu gos ohcat, lohká Finnmárkku politiijaguovllu operašuvnna jođiheaddji Robin Fure preassadieđáhusas.
Yannick Schütz vulggii meahccái vánddardit jáhkkimis suoidnemánu 8. beaivvi. Ovdalgo vulggii galgá almmái leat muitalan bearrašii ja skihpáriidda ahte son áiggui jávkat birrasii 14 beaivvi, muhto ii muitalan gosa son lei manname.
– Mii leat ija ohcan, ja beaivvi mielde ohcagoahtit maid jávkan olbmo dronain Stuorrajávrri guvlui, muitala Finnmárkku politiijaguovllu operašuvnna jođiheaddji Robin Fure ja bivdá veahki álbmogis:
– Jus oktage lea daid maŋemus vahkkuid oaidnán Schütz, de ávžžuhit váldit oktavuođa politiijaiguin, tlf 02800.