72 proseantta norgalaččain sávašedje ahte buohkaide galggašii sihkkeljealbmagohčus. Dat boahtá ovdan iskkadeamis man Trygg Trafikk ja Tryg Forsikring leat čađahan.
– Mii oaidnit ahte stuora oassi oaivvildit ahte oaivesuodji galggašii lága bokte gohččojuvvon buohkaide geat sihkkelastet dahje geavahit el-sihkkela. Norggas lea jealbmageavaheapmi lassánan, muhto leat goitge oallugat geat eai geavat jealmma go sihkkelastet.
Mii čuovvut lihkohisvuođaovdáneami ja jealbmadutkama, ja jurddašit dávjá lea go okta obbalaš jealbmagohčus juoga man mii áigut vuoruhit, lohká Trygg Trafikk kommunikašuvnnaráđđeaddi Christoffer Solstad Steen.
Dušše 11 proseantta oaivvildit ahte jealbmagohčus galgá dušše guoskat vuollel 16-jahkásaččaide, ja dušše 14 proseantta lea jealbmagohččosa vuostá.
– Mii leat oaidnán ahte stuoragávpogiin leat lassánan sihkkel-lihkohisvuođat maŋemuš jagiid. Sihkkelastit ja vázzit fertejit vuoruhuvvot johtalusas. Dat sáhttá dagahit stuorit johtalusásahemiid boahtteáigái, nu ahte ii leat eahpelunddolaš jus jealbmagohčus boahtá, lohká Steen.
