Leat eambbo gárrendilleváidojuvvon biilavuoddjit dán jagi buohtastahttojuvvon diimmá ektui, čájehit logut UP:s. MA – Rusfri Trafikk dadjet dat leat buorit ođđasat.
Jahkebealraporta UP:s (Utrykningspolitiet) čájeha dán jagi vuosttaš guhtta mánu de váidojuvvo 5492 olbmo, geaid balahit leat vuoddján gárrendilis. Dat mearkkaša de leat juohke beaivvi 30 biilavuoddji miehtá Norgga, geaid bossuniskkus čájeha rukses ivnni, mii muitala sii leat gárrendilis.
Buohtastahttojuvvon seamma áigodagain diibmá de lea lassáneapmi masá 600 váidimiin.
– Nu guhká go mii diehtit ahte politiijat eai nagot bissehit buot gárrendillevuoddjiid, de fertet leat giitevaččat go váldojit váidon ja bissehuvvon, gárrenmirko vuoddjit, dadjá Elisabeth Fjellvang Kristoffersen, generálačálli MA – Rusfri Trafikkas.
