– Stuora gudni oažžut dán bálkkašumi

«Jagi sápmelaš» lea bálkkašupmi man Suoma oaivegávpotguovllu sámesearvi City-Sámit juohká dál goalmmát háve.

– Mun oainnán, ahte «Jagi sápmelaš» nammadeapmi lea lávdi dahje bargoneavvu, man sámi álbmot addá ovtta sápmelačča geavahussii jahkái ain hávil. Nammadeapmi addá vejolašvuođa ja geatnegahttá bargat sámiid ovdii ja čuvgehit váldoálbmoga. Illudan sakka boahttevaš jagis! Giitu vel oktii, lohká Pirita Näkkäläjärvi iežas Facebook-siiddus.

Näkkäläjärvi orru dál Helssegis, muhto lea eret Anáris.

Son lea guhká bargan dan ovdii, vai sápmelaččat oidnošedje medias. Maiddái sámiid rievttit leat leamaš sutnje váibmoáššin, čállá YLE Sápmi.

Sámeáššit váimmus

Pirita Näkkäläjärvi barggai Yle Sámi hoavdan jagiin 2012-2016.

Ovdal go válljejuvvui Yle Sámi hoavdan, son lei maid sámediggeáirras 2012:s.

Näkkäläjärvi lea álggahan dán čavčča ođđa barggus Helssegis, PwC Strategy& -fitnodagas.

Juovlamánus son geargá London School of Economics -skuvllas, gos son lea čađahan magisttaroahpuid media- ja diehtojuohkinsuorggis MSc Media & Communications kurssas.

Su magisttarloahppabargu gieđahallá sámiid sátnefriijavuođa Suomas, dieđiha YLE Sápmi mii ovddemus čáli dáhpáhusa birra.

Máhttá mediaváikkuheami vugiid

– Jagi sápmelačča dehálaš doaibman lea ovddastit sápmelaččaid almmolašvuođas ja doaibmat min jietnan, muitala City-Sámit searvvi ságadoalli Inka Musta YLE Sápmái.

Searvvis jáhkketge, ahte Näkkäläjärvis leat buorit dáiddut ja vejolašvuođat doaibmat Jagi sápmelažžan go lea hárjánan media vugiide ja leat almmolašvuođas.

Musta joatká maid, ahte Näkkäläjärvi viiddis fierpmádagat bohtet sihkkarit veahkehit dán doaimmas.

«Jagi sápmelaš» bálkkašupmi geigejuvvui Helssegis lávvordaga 11.11. Álbmotmuseas Duoji Vuoigŋa dáhpáhusas.

Vuosttaš «Jagi sápmelaš» -bálkkašumi oaččui anárlaš sámegiela lektor Outi Länsman 2015:s. 2016:s jagi sápmelažžan válljejuvvui ohcejohkalaš dáiddár Niillas Holmberg.