-Almmuhus-
OĐĐASAT– Stuora gudni oažžut beroštumi

– Stuora gudni oažžut beroštumi

-

-

Ruoŧa Sámedikki stivraságadoalli Håkan Jonsson lohká mearkkašit hui ollu oažžut ON Eamiálbmotvuoigatvuođaid áššiid erenoamášdieđiheaddji Victoria Tauli-Corpuz deike.

Konferánsa álggii distaga ja dalle fitne oasseváldit plánejuvvon ruvkebáikki Raavrejohkes (Rönnbäck). Doppe oaččui Victoria Tauli-Corpuzii dieđuid daid váikkuhusaid birra maid nikkelruvke dagaha jus dat ásahuvvo Raavrejohkii. Mátkkis ledje maiddái Vaapsten čearu ja Vaapsten Sijte ovddasteaddjit fárus.

– Mii leat hui ilus ja lea stuora gudni midjiide ahte erenoamášdieđiheaddji čájeha ná stuora beroštumi sámi guovlluide, ja su mátki deike mearkkaša midjiide hui olu, lohká Sámedikki stivraságadoalli Håkan Jonsson. 

 

Deattuha Suoma sámiid dili

Sámiráđi jođiheaddji Áile Javo áigu deattuhit earenoamážit Suoma sámiid dili Victoria Tauli-Corpuzii.

– Mii áigut váldit áššiin mii dáhpáhuvai Suoma bealde giđđat, go galge ILO-konvenšuvnna gieđahallat ja ođđa sámelága. Mii leat hui beahtahallan mo dat meannudeapmi manai ja Suopma lea máŋgii dadjan riikkaidgaskasašdásis ahte sis lea áigumuš dohkkehit ILO-konvenšuvnna, lohka Javo Yle Sápmái.

 

Boazodoalu hástalusat

– Áigut maid deattuhit boraspireváttisvuođa. Dat lea stuora váttisvuohta buot riikkain, Suomas, Norggas ja Ruoŧas. Leat menddo ollu boraspiret boazodoalloguovllus ja buhtadusortnegiin lea buoridanmunni, lohká Sámiráđi ságajođiheaddji Áile Javo Yle Sápmái.

 

Nuppes go ON erenoamášdieđiheaddji galleda

ON Eamiálbmotvuoigatvuođaid áššiid erenoamášdieđiheaddji bargu lea čuovvolit, rapporteret ja rávvet ráđđehusaid movt galget gieđahallat álgoálbmotáššiid iešguđet riikkas.

Dát lea nubbi geardi go ON Eamiálbmotvuoigatvuođaid áššiid erenoamášdieđiheaddji galleda Sámi. Victoria Tauli-Corpuz nammaduvvui ja válddii badjelasás dán ámmáha geassemánus 2014 maŋŋel professor James Anaya. Anaya galledii Roavvenjárgga Suomas 2010, ja deaivvadii dalle davviriikkalaš sámedikkiiguin ja ráđđehusaiguin.

Odne, gaskavahkku maŋŋelgaskabeaivvi dii. 16 lea várrejuvvon áigi preassakonferánsii dieđiha Ruoŧa Sámediggi neahttasiiddus.

-Almmuhus-