Sámediggeráđi čilgehus sohkabealdásseárvvu birra lea dán áigodaga viđat čilgehus dásseárvosuorggis.
– Sohkabealdásseárvu lea ain hui áigeguovdilis fáddá máŋgga servodatsuorggis. Maŋemus jagiid dutkan lea almmustahttán stuorra erohusaid sohkabeliid gaskkas deaŧalaš surggiin sámi servodagas, dadjá sámediggepresideanta Aili Keskitalo (NSR).
Sámediggi čállá preassadieđáhusas ahte oahpahussuorggis sii dihtet ahte eanet sámi albmát go nissonat heitet gaskan joatkkaoahpahusas, ja ahte nissoniidda lea váddásat ásahit iežaset ovdamearkka dihtii vuođđoealáhusaide.
– Mii oaidnit dálá bargoeallimis rievdama mas nissoniid rolla dađistaga nannejuvvo. Eanet nissonat ásahit iežaset árbevirolaš almmáifidnuide ja nissoniid váikkuhanfápmu vuođđoealáhusain nannejuvvo, gávnnaha Keskitalo.
Keskitalo dadjá ahte árbevirolaččat lea sohkabealdásseárvu adnojuvvon nissonáššin, ja máŋgga suorggis dat ain lea nu.
– Min mielas lea deaŧalaš ahte sihke nissonat ja albmát servet digaštallamii, ja mii háliidit ahte Sámediggi galgá ovddasmannin ja buorren ovdamearkan dásseárvvu oktavuođas, loahpaha presideanta.
