Stuora dutkan jođus

Mánnodaga eahket lei iešsorbmenakšuvdna Manchester gávpogis, Englánddas. Bomba bávkkehii Manchester Arena konseartaviesus, ja unnimusat 22 olbmo jápme.

Vearredahkki identitehta ii leat vel almmolaš, ja politiijat leat dutkame sáhttá go gullevaš stuorát jovkui. Politiijat bivdet ahte olbmot eai árvádala gii vearredahkki sáhttá leat.

– Stuora dutkan lea jođus, dieđiha Manchester politiijahoavda Ian Hopkins.

Mánát ja nuorat jápmán

Iđđes diimmuid ledje 22 olbmo jápmán, ja 59 roasmmehuvvan. Politiijaid dieđuid mielde ledje olu nuorat ja mánát.

Vihttanat muitalit ahte lei váibmobávččagahtti Manchester Arenas, gos Amerihká artista Ariana Grande aiddo lei loahpahan iežas konseartta.

– Čuovga lei juo cahkkehuvvon, ja mii ipmirdeimmet ahte ii lean oassi konsearttas. Mii jáhkiimet ovttatmano ahte lei bomba. Bođii olu suovva, ja olbmot viehkagohte olggos, muitala 20-jahkásaš Erin McDougle The Guardian aviisii.

Uvssa lahka bávkkehii

Andy Holey galggai viežžat eamida ja nieidda konsearttas, ja son muitala ahte son bálkestuvvui logi mehtera go bomba bávkkehii.

– Go bessen fas čuožžut, de oidnen olbmuid veallut das iežan birra, muitala son BBC:i.

– Lei hui sihkkarit bávkkanas, ja lei hirbmat fámolaš. Lei bileahttakantuvrra lahka, uvssa lahka, muitala Holey.

Stuora oassi sis geat ledje báikkis, ledje mánát ja nuorat. Heađástuvvan váhnemat ohce disdaga čuovganeapmái mánáideaset Manchestera gáhtain.

Norgalaš Jan Morten Haukefær (37) ja su nieidabealli leigga konsearttas, muhto eaba roasmmehuvvan terrordagus.

– Son lei juste lávlon maŋemuš lávlaga, ja de cahkkehuvvojedje čuovggat. De mii gulaimet guokte bávkkanasa. Dalle huikkádii soames, ja buohkat álge olggos viehkat, muitala Haukefær VG aviisii.

– Mun in ipmirdan maide, mu nieida ballái hirbmadit. Moai viehkaleimme giehtalaga. Olbmuin lei panihkka ja buohkat vihke. Lea ipmirmeahttun jurddašit ahte leimmet aiddo das, dan fiinna konsearttas. Lea issoras, muitala son.

Artista morašta

Ariana Grande lei heađásnuvvan maŋŋil terrordagu, ja lea gaskaboddosaččat bissehan Eurohpá gierdomátkki.

– Mu váimmu čiekŋalasas lea nu váivi ahte in gávnna sániid, čállá artista Twitteris.

– Mii moraštit buohkaid geat jápme dán váiggas dáhpáhusas. Mii bivdit din jurddašit oaffariid birra, sin bearrašiid ja buohkaid geaidda guoská, lohká Grande manager Sciiter Brain TMZ magasiidnii.

Heahtečoahkkin

Stuorra-Británnia stáhtaministtar Theresa May čohkkii ráđđehusa koordinerenorgána heahtečoahkkimii.

– Mii leat geahččaleame oažžut obbalašgova dáhpáhusas man politiijat meannudit terrordahkun. Min jurdagat mannet gillájeddjiide ja sin bearrašiidda, lohká May disdaga čuovganeapmái.

Stuorra-Británnias lea válga geassemánu 8. beaivvi, muhto May ja olu su politihkalaš vuostálastit leat bissehan válgagičču gaskaboddosaččat.

Ii okta ge norgalaš roasmmehuvvan

– Min jurdagat ja oassádallandearvvuođat mannet gillájeddjiide ja sin bearrašiidda, čállá olgoriikaministtar Børge Brende Twitteris disdaga iđđes.

– Min dieđu mielde eai galgga norgalaččat roasmmehuvvan, lohká Olgoriikadepartemeantta preassaoktavuohta Astrid Sehl NTB:i disdaga čuovganeapmái.

Olgoriikadepartemeantta ávžžuha norgalaččaid gulaskuddat báikkálaš eiseválddiiguin, ja čuovvut sin rávvagiid.

– Mii ávžžuhit maid norgalaččaid, geat leat Manchesteris, váldit oktavuođa oapmahaččaiguin Norggas, ja dieđihit movt lea dilli, lohká Sehl. (©NTB)