– Mii sávvat Bamsii lihku bálkkašumiin ja leat E-skuvlla bealis hui ilus, go leat fargga logi jagi jo beassan jorgalit ja fállat Bamse sámegielat mánáide, dadjá E-skuvlla Kirsi Paltto.
Bamse-bláđđi lea ožžon Ruoŧa áigečallagiid stuorra bálkkašumi (Sveriges tidsskrifters stora pris). Bálkkašupmi juhkkojuvvo oktii jahkái olbmui, áigečállagii dahje fitnodahkii, mii lea dahkan mearkkašahtti barggu Ruoŧa áigečálasuorggi ovdii.
Jury ákkastallan lea earret eará ahte Bamse áigečála lea fargga vihttalot jagi leamaš oskkáldas iežas servodatpatosa ektui ja lea čuvvon ođđa buolvvaid dan bokte ahte dat lea čađat leamaš relevánta iežas ulbmiljovkui, mii dađistaga rievdá.
– Vuoitis lea guhkes historjá, man olis dat lea guoimmuhan, ohcan ártnaid ja seammás oahpahan midjiide man mávssolaš lea doalahit iežamet árvvuid. Álo mánáid bealis, mánáid eavttuiguin. Jagi vuoiti geavaha iežas givrodaga rievttes láhkai – go dan han buohkat dihtet, ahte Bamse lea máilmmi šiegamus guovža, čállá bálkkašumi jury.
