Politiijat bivdet olbmuid cavgilit maŋŋel go muhtin lea gaikon sisa rámbuvrii Hámmárfeasttas.
Mánnodaga iđđedis ožžo politiijat dieđu, ahte muhtin lea gaikon sisa Jysk rámbuvrii Hámmárfeasttas mannan vahkkoloahpa. Dán birra dieđiha Finnmárkku Politiijaguovlu Twitteris.
– Stuora árvosaš diŋggat leat suoláduvvon. Jus dus leat cavgileamit áššái, váldde oktavuođa minguin telefovnna bokte nummarii 02800 dahje 789 72000.
Politiijat eai dieđe mii lea geavvan ja gii dán lea dahkan, ja bivdet dan dihte veahki olbmuin.
– Eat leat vel ožžon makkárge cavgilemiid, go leat aitto almmolaččat mannan dáinna olggos. Muhto danne bivdit mii olbmuid cavgilit, geat soitet oaidnán juoidá eahpedábálačča – nugo olbmuid dahje biillaid, erenoamážit ihkku, lohká Hámmarfeasta politiijastašuvnna sekšuvdnajođiheaddji, Asgeir Aule Ávvirii.
Badjel 100 000 ovddas
Politiijat eai vel dieđe justte man olu ja makkár diŋggat leat suoláduvvon, muhto dás lea sáhka hirbmat stuora árvosaš diŋggain.
– Mis ii leat vel ollislašgovva, muhto jáhkkimis lea ollislaš árvu diŋggain mat leat suoláduvvon – olu badjel 100 000 ruvnno, lohká Aule.
Bargoreaiddut jávkan
Visti, gos Jysk rambuvra lea, leat justte bargame ođasmahttit. Olu diŋggain mat leat jávkan, ledje bargoreaiddut mat geavahuvvo ođasmahttinbarggus.
– Olu dain diŋggain mat leat jávkan, leat bargoreaiddut, nugo earret eará bargočuovggat, muitala Aule.
