Koronapandemiija lea ain hástalussan studeanttaide. Oahppobaromehter čájeha ahte eanaš oassi studeanttain masset oahppanmovtta digitála oahpahusain ja sii váillahit oahppobirrasa sosiála eallima.
– Studeanttat duođaštit ahte guokte maŋimuš jagi leamaš hástalussan sidjiide sihke sosiálalaččat ja fágalaččat. Mii oaidnit ahte oallugat masset movtta digitála oahpahusa geažil, ja dan váldit duođas. Lean hui ilus go studeanttat viimmat besset máhccat oahppobáikái, gos ožžot eanet dábálaš studeanttaeallima. Oahppokvalitehta šaddá buorebut go studeanttat ja logaldallit leat seamma sajis, lohká dutkan ja alit oahpu ministtar Ola Borten Moe preassadieđáhusas.
Birrasii 30 000 studeantta leat searvan oahppobaromehtera guorahallamii mii galgá govahallat studeanttaid dili. Studeanttat vástidit daid seamma gažaldagaid jahkásaččat, muhto dál leat maiddái jearran studeanttain koronadili ja neahttaoahpahusa birra.
Barget eanet
Guorahallama bohtosat čájehit ahte studeanttat geavahit ain seamma olu áiggi ohppui, muhto dál geavahit eanet áiggi lohkamii go oktasaš oahppodoaimmaide. Diibmá besse studeanttat geavahit eanet áiggi bargohárjehallamii ja eará oahppohárjehallamiidda go 2020:s.
Studeanttat muitalit viidáset ahte leat geavahan eanet áiggi dienasbargui, ovddit jagi rájes lea bargoáigi lassánan birrasii diimmu vahkus. Profešuvdnastudeanttat dat barget eanemusat ja oallugat leat bargan dearvvašvuođasuorggis, mánáidgárddiin ja vuođđoskuvllain.
– Studeanttat geat leat bargan dearvvašvuođabálvalusain, skuvllain ja mánáidgárddiin leat ožžon vejolašvuođa dinet eanet nu ahte eai leat massán stipeandda. Čájehuvvo ahte olu studeanttat leat háliidan veahkehit koronaáiggi ja sii leat dahkan erenomáš buori barggu dáin surggiin, lohká Borten Moe.
