-Almmuhus-
OĐĐASATStreptokokkváruhus maŋŋel go váhnenbárra jámiiga

Streptokokkváruhus maŋŋel go váhnenbárra jámiiga

-

-

Davvinjárggas politiijat ja suohkandoavttir sáddejit váruhusa maŋŋel go viđalotjahkásaš váhnenbárra gávdnuiga jápmán lávvordateahkeda Geaissvearas, Davvinjárggas.

Sotnabeaivvi lágiduvvui álbmotčoahkkin Geaissvearas.

Doppe dieđihuvvui ahte leigga buohcan ovddit lávvordaga rájes, ja finaiga duorastaga doaktára luhtte. Doppe oaččuiga dálkasiid streptokokkaid vuostá, dieđiha Finnmárkku politiija Runar Elde.

Dássážii dattege ii leat duođaštuvvon masa dát olbmoguovttos jámiiga.

 

Ávžžuha olbmuid váldit oktavuođa doaktáriin

Suohkandoavttir Erik Langfeldt muitalii ahte muhtin sorttat streptokokkat sáhttet leat váráleappot go earát. Son ávžžuha olbmuid váldit oktavuođa doaktáriin jus dovdá čottabákčasa ja alla febera.

Sudno mánát ledje maid buohccit, ja sáddejuvvojedje Hámmárfeastta buohccivissui gos ožžo divššu. Sotnabeaivvi besse mánát vuolgit ruoktot Davvinjárgii.

Politiijat leat guorahallamiid dahkan bearraša ásodagas, ja dutkagohtet dál vihtaniid. Váhnenguoktá rupmašiid leat sádden Romsii viidáset obdukšuvdnii.

Sotnabeaivvi maŋŋelgaskabeaivvi lei Geaissvearra girku rabas olbmuide geaidda ášši čuohcá.

(©NTB)

-Almmuhus-