Koronalávdegoddi lohká ráđđehusa nagodan dohkálaččat gieđahallat pandemiija.
Norgga Koronalávdegoddi geigii bearjadaga raportta stáhtaministarii Jonas Gahr Størei (Bargiidbellodat), jagi maŋŋel go bargagohte. Lávdegoddi lea árvvoštallan movt eiseválddit obbalaččat hálddašedje covid-19 pandemiija.
Sihke Solberg- ja Støre-ráđđehusat fertejedje gáržžidit doaimmaid ja ožžot moaitagiid. Muhto obbalaččat gal oaivvilda lávdegoddi ahte sii dohkálaččat gieđahalle heahtedili.
Muhto muhtin osiid pandemiijagieđahallamis gal moitet, earret eará go joatkkaskuvllain fas válde atnui rukses dási.
Beare garrasit gáržžidedje
Raporta čállá ahte eiseválddit árvvoštalle iešiskosiid beare dárbbašlažžan ja nu mearridedje dárbbašmeahttun gáržžidemiid go omikronvariánta bođii 2021 čavčča. Norggas váilo iešiskosat 2021 čavčča rájes gitta 2022 ođđajahkái, ja dat čuozai álbmogii.
– Ollu jávkama skuvllain ja muđui servodagas ođđajagis 2022 livččii sáhttán garvit jus livčče jeavddalaččat iskan iešiskosiiguin dan ovdii go mearridit karantenegáibádusaid, čállá lávdegoddi.
– Ledje dakkár áššit maid olbmot vásihedje noađđin, dan ipmirdan bures. Muhto lei dárbbašlaš. Go geahpedeimmet doaibmabijuid ja heaittiheimmet daid árrat 2022:s, de oinniimet ahte Norga čađahii dan buorebut go measta buot eará riikkat, dadjá stáhtaministtar NTB:ii.
Ráđđehus ii ge nagodan addit doarvái buriid dieđuid ahte váilot dakkár iešiskosat, ja livčče galgan čilget buorebut ahte danne šadde skuvllaid bidjat rukses dássái, čállet sii.
– Hearkkimusat gillájedje eanemusat
Sosialisttalaš Gurutbellodat oaivvilda ahte raporta duođašta ahte njoammuneastadeapmi dagahii vel vearrát dili sidjiide geat eanemusat juo gillájedje.
– Leat ollugat geat ain gillájit pandemiija geažil. Ráđđehus behtii hearkkimusaid go giddejedje dehálaš fálaldagaid nu go astoáiggedoaimmaid ja valáštallama, dadjá SG nubbijođiheaddji Marian Hussein.
– Mii oaidnit maiddái man unnán galgá ovdal go dagahit dearvvašvuođadoaimmahaga váttis dillái. Dearvvašvuođadoaimmahat ferte šaddat njuovžileabbon, muhto de ferte rievdadit vuogádaga ja lasihit vuođđobargoveaga, ii ge bidjat lassi bargonoađi bargiide, dadjá Hussein.
(©NTB)
