-Almmuhus-
-Almmuhus-
OĐĐASATStohpu bulii Jergulis

Stohpu bulii Jergulis

-

-

Duorastat eahkeda ožžo politiijat dieđu ahte muhtin stohpu Jergulis, Kárášjoga gielddas, lea buollimin.

Ovdalaš diibmu gávccis ievttá eahkeda oaččui 110-guovddáš dieđu stohpobuollimis Jergulis ja buot heahteveagat sáddejuvvojedje báikái.

 

Dolat seainnis

Politiijat muitaledje almmuheaddji muitalan oaidnán dola stohposeainnis.

Finnmárkku politiijaguovllu operašuvdnajođiheaddji, Thomas Pettersen, muitalii dakka maŋŋel ahte sihke politiija ja ambulánsa vuoddjájedje báikái.

 

Buollán oalát

Operašuvdnajođiheaddji almmuhii ovdalaš gaskaija ahte stohpu lei buollimin bures go heahteveahka joavddai báikái.

– Mii leat ožžon duođaštuvvot máŋgasis ahte ii oktage galgga leat ruovttus. Olmmoš, gii eaiggáduššá stobu, lea mátkkis, muitalii Thomas Pettersen iFinnmark neahttaáviisii.

 

Geahččaledje jáddadit

iFinnmark neahttaáviisa lea leamaš oktavuođas muhtin kránnjáin. Son muitalii ahte buollinveahka lea nagodan oažžut dola muhtin muddui čáskat.

Viidáset muitalii kránnjá ahte stohpobuollin álggii stohposeainnis.

– Buollin álggii olgoseainnis dakko gokko elrávdnji manná stohpui sisa. Lei ollu suovva stobu siste ja stohpu lei oalát buollán. Stohpu lea oalát billašuvvan.

 

Oalát billašuvvan

Bearjadatiđida muitala Finnmárkku politiijaguovllu operašuvdnajođiheaddji Lars Gaupset ahte buollin čáskaduvvui gaskaija sulaid.

– Stohpu lea buollán oalát siskobealde, dadjá son iFinnmarkui.

 

Áigot dutkat

Politiijat eai dieđe buollinsiva.

– Mii fertet dutkat ášši, dadjá Gaupset.

Stobus ii lean oktage go buollin álggii.

 

 

-Almmuhus-