Muorat gahččan ja fearggat bisánan. Ii váhčče ovdal go jándora geahčen.
Muorat gahččan ja fearggat bisánan. Ii váhčče ovdal go jándora geahčen.
Metorologalaš instituhtta lea sádden ekstremadieđáhusa Davvi-Norgii. Stoarbma «Ylva» lea jođus davás. Vuosttaš diehtu vahága birra bođii duorastaga iđđes.
– Muorra lea gahččan ja lea doarrás luotta alde. Olbmot leat jođus báikái, galget váldit muora eret. E6 lea giddejuvvon, čállet Nordlándda politiijat Twitteris.
Okta olmmoš vujii muora njeaiga dalle go muorra gahčai, muhto ii leat sáhka eará go materialisttalaš vahágiin, dieđihit politiijat.
Muorra gahčai Majavatnis E6 buohta. Diimmu maŋŋil, sullii diibmu guđas duorastaga iđđes, lei eará muorra gahččan luotta ala. Dát lei Kvænfloghøydas, Fuoskku guovllus.
– Muorra gahččan luotta ala. Várut jus leat vuodjime. Bohtet fargga muora doalvut, čállet politiijat Twitteris.
Fearggat
Politiijat dieđihit ahte erenoamážit stuora biillat berreše váruhit. Lei bosádan muhtun busse eret luottas Romssas.
Fuoskkus fas bosádan dáhkkepláhtaid eret visttis.
Olu fearggat leat šaddan bisánit dálkki dihte. Olu luottat leat maid gitta, earret eará Sáltoduoddaris, Umbuktas ja Bonjováris.
Bivdet olbmuid leat várrogassan
Diehtu sáddejuvvui gaskavahkku eahkes, ja gusto Romsii, Helgelándii, Sáltoduoddarii, Sáltui ja Ofuhttii.
Politiijat bivdet olbmuid leat várrogassan ja sihkkarastit luovos diŋggaid. Roasut sáhttet leat 50 mehtera sekunddas.
Stoarbma deaivá eanas siskkit guovlluid, dieđiha Meterologalaš instituhtta.
Helgelánddas, Sáltoduoddaris, Sálttus ja Ofuohtas váhčče duorastateahket. Davvelis easka bearjadatiđida. (©NTB)
