Bargiidbellodat, Árja ja Olgešbellodat vuolláičálle álggahanjulggaštusa, mainna buohkat lohket leat duhtavaččat, vaikko fertejit stivret unnitlogus. GEAHČA VIDEO.
Bargiidbellodat, Árja ja Olgešbellodat vuolláičálle álggahanjulggaštusa, mainna buohkat lohket leat duhtavaččat, vaikko fertejit stivret unnitlogus. GEAHČA VIDEO.
Diibmu 12:30 bearjadaga ledje sámedikkis bovden preassakonferánsii, gos vuolláičálle ođđa ovttasbargosoahpamuša, dahje julggaštusa, mas ovdanbohtet čuoggáid mielde áigumušat. Bargiidbellodagas leat oktiibuot 10 áirasa, Árjjas 4 áirasa ja Olgežis leat 2 áirasa. Áigumuš lea 16 áirasiin dál stivret Sámedikki.
Ovttasbargo áigumušat
Bargiidbellodaga ođđa presideanta Vibeke Larsen muitalii preassakonferánssas muitalii soahpamuša sisdoallat konkrehta áigumušaid ovttasbargguin.
– Earet eará ahte mii áigut bargat eambo ja leat eambo oidnosis álbmogii gitta válggaid rádjai, dadjá Vibeke Larsen.
Ávvir jearrá man ollu lea Bargiidbellodat šaddan addit ja váldit soahpamuša gárvedettiin.
– Mii eat leat šaddan addit eambo go mii lea gáibiduvvon ja lea varra sivva manin leat ožžon mielde guokte bellodaga ovttasbargui, dadjá Larsen ja lohká suokkardeami leamaš buorrin álggu rájes.
Olgešbellodaga ráđđelahttu Lars Filip Paulsen maid rámida ovttasbarggu ja ságastallama lihkostuvvan bures álggu rájes juohke suorggis.
– Mis lea leamaš oalle buorre gulahallan ja mis leamaš viiddes ovttaoaivilvuohta álggu rájes dán proseassas. Dát guoská maiddái ovttasbargosoahpamuša, mas mii leat hui ovttaoaivilis buot čuoggáin, lohká Lars Filip Paulsen.
Mearridit ieža
Ávvir jearrá man mielas sihke Bargiidbellodaga ja Olgešbellodat guovddášorganisašuvdna lea dán ovttasbargui.
– Dat leat sápmelaččat Bargiidbellodagas, geat mearridit sámepolitihkas, eaige guovddášpolitihkas sáhtte boahttet mearridit dáppe Sámedikkis. Sii sáhttet áinnas geahččalit buktit rávvagiid, muhto mii váldit loahpalaš mearrádusaid, deattuha Vibeke Larsen, gii lohká sin ožžon dieđu ahte váldoorganisašuvdna lea fuolastuvvan ovttasbarggus, muhto ii oainne dan hehttehussan.
Olgešbellodaga Lars Filip Paulsen lohká sin dieđihan proseassa birra guovddášorganisašuvdnii ja lohká sin ožžon doarjaga doppe.
– Mii oaččuimet dieđu árvvoštallat ieža ja sii luhttet midjiide, ahte mii váldit daid rivttes mearrádusaid mat leat buoremusat min Sámedikke jovkui, čilge Paulsen.
Árjja parlamentáralašjođiheaddji Laila Susanne Vars, gii ii šat joatkke politihkarin ođđajagi rájes, lohká sin leat sámebellodahkan, mas lea iežas bellodatstivra, eaige dárbbaš vuhtiiváldit earáid. Son ii loga Árjja leamaš posišuvnnaid maŋis.
– Mii leat giitevaččat go Bargiidbellodat ja Olgeš leat dorjon min váibmoáššiid, earet eará meahcástanpolitihka, giella ja oahpahuspolitihka. Ja dál dovddan ahte ráđis lea vejolaš fas dáid áššiid, rámida son.
