Suoma beale Sámedikki stivra čoahkkanii mánnodaga čakčamánu 2. beaivvi, jagi logát čoahkkimii gáiddusoktavuođaid bokte. Áššelisttus lei dušše okta ášši, Sámedikki ortniiduvvančoahkkima válmmaštallan.
Lea lahttu guhte guhkimus áigge lea doaibma Sámedikki lahttun, Anne Nuorgam Ohcejogas, guhte rahpá ortniiduvvančoahkkima. Nuoraid sáhkavuoru doallaba Sámedikki nuoraidráđi válljejuvvon ovddasteaddjit Rosa-Máren Juuso, Eanodagas ja Mihku Näkkäläjärvi, Anáris.
Ortniiduvvančoahkkima áššelisttus leat earret eará sátnejođiheaddji ja guokte várresátnejođiheaddji ja stivrra njealje eará lahtu válljemat.
Dasa lassin áššin leat ahte Sámediggi ásaha ortniiduvvančoahkkimis ealáhus- ja vuoigatvuođalávdegotti, skuvlen- ja oahppamateriálalávdegotti, kulturlávdegotti, sámi giellaráđi, sosiála- ja dearvvasvuođalávdegotti ja nuoraidráđi ja nammada ovddasteaddjiid čuovvovaš doaibmaorgánaide dahje bargojoavkkuide.
Dáidda doaibmaorgánaide dahje bargojoavkkuide válljejit lahtuid: Sámi parlamentáralaš ráđđi, bismagoddestivra ja girkolaščoahkkin, sámiid skuvlenáššiid ovttasbargoorgána, sámiid sosiála- ja dearvvasvuođaáššiid ovttasbargoorgána, anárašáššiid ráđđádallangoddi, etihkalaš rávvagiid doaibmaorgána, Barents euroárktalaš ráđi eamiálbmogiid bargojoavku ja Sámi Giellagáldu stivra.
