Leila Nutti, Johkamohkis, oažžu dán jagáš stipeandda Kaija Anstensena muitofoanddas. Nutti oažžu stipeandda ovddidan dihte su barggu ruohtasdujiin.
Nuorra boazovázzi, dáiddar, duojár ja čálli Leila Nutti oažžu dán jagáš stipeandda Kaija Anstensena muitofoanddas. Nutti lea bargame árbevirolaš sámi ruohtasduoji dokumenteremiin ja ovdánahttimiin, čállá muitofoanda preassadieđáhusas.
– Mon lean giitevaš go Kaija Anstensena muitofoandda stivrras lea luohttevašvuohta munnje, ja illudan oahppat eanet dán árbevirolaš sámi duodjisuorggi birra, dadjá Leila Nutti preassadieđáhusas.
Dokumenteret sániid
Eai leat gallis geat barget ruohtasdujiin otná beaivvi, ja iežas barggu čada háliida Nutti loktet dieđu dan duodjesuorggi birra. Iežas prošeavttas son háliida čalmmustahttit geográfalaš erohusaid ruohtasduojis ja dokumenteret sániid mat leat čadnon dasa.
Stipeandda čađa Kaija Anstensena muitofoanda háliida čalmmostahttit sámi duoji ja árbevirolaš máhtu, ja movttiidahttit Nutti iežas barggus. Stipeandda submi lea 20 000 ruoŧa ruvnnu.
Stipeanda mii galgá nannet rivttiid ja kultuvrra
Stockhoalmma Sámesearvi álggahii Kaija Anstensena muitofoandda sierra vuođđudussan 2008:s, go lei ožžon árbbi Kaija Anstensenas. Kaija Anstensen orui Stockhoalmmas, muhto su sohka lei orjješsámi guovllus Norgga bealde. Stipeandda ulbmil lea nannet sámi rivttiid ja sámi kultuvrra.
Vuosttas stipeanda juolluduvvui 2011 Fia Kaddikii. Dan maŋŋel leat Elin-Anna Labba, Silje Figenschou Thoresen, Paul-Anders Simma, Carola Grahn, Heidi Juliana Gauriloff, Lena Viltok, Sara Ajnnak, Liv Aira ja Marika Renhuvud ožžon stipeandda.
