Vaikko Statskog lea divodan máŋga bartta geasset, de dieđihit sii ahte dan dihte leat láigohan seamma ollu barttaid go diimmá geasi, vaikko soames barttat ledje gitta. Dál rahpasa vel okta barta olbmuide.
– Statskog barttaid láigofálaldat lea hui buorre fálaldat. Dat addá buriid vejolašvuođaid meahcis vuoiŋŋastallat ja vásihit olgun leat viiddis guovlluin Norggas, ii ge leat divrras, muitala eanadoallo- ja biebmoministtar Jon Georg Dale.
Bivnnuheamos barttat
Barttat gos eanemus olbmot finadit leat Valsjøhytta, Elgstølen, Sjølyst, Synnervika, Veksenvika, Veksen ja Lelanghytta. Badjel 70 proseantta olbmuin fitne dáin barttain.
Statskog muitala ahte leat guossit iešguđet agis ja olgoriikka turistat maid geavahit dán fálaldaga.
Statskogas leat barttat miehtá riikka, maid olbmot sáhttet láigohit. Čakčat lávejit ollugat jearrat láigohit barttaid, erenoamážiid báikkiin gos lea vejolaš bivdit, čállá Eanandoallo- ja Biebmodepartemeantta sin neahttasiiddus.
Huksen ođđa bartta
Rendalenis lea áibbas ođđa barta mii rahpasii aittobáliid. Statskog jáhkká bartta šaddat bivnnuhin dás ovddos.
Statskogas leat maid badjelaš 100 rabas barttaža. Ollugat leat finadan barttažiin dán geasi, ja leat vuohkkasat jus áiggut gáfestallat meahccemátkis, dahje jus dárbbašat suodjebáikki mátkis. Statskog lea ráhkadan gihppaga mas gávdnojit dieđut barttaid birra.
