Norgga «oljojiehtanas» Statoil lea okta dain čuođi fitnodagain mat nuoskkidit máilmmis buot eanemusat, olles 71 proseantta máilmmi klimágássaluoitimiin 1988 rájes bohtet dain fitnodagain. Statoilas boahtá 0.52 proseantta industriijaealla klimágássaluoitin ja lea 37. sajis listtus.
Fitnodatnamat leat almmuhuvvon Carbon Disclosure Project-klimaorganisašuvnna raporttas, čállá The Guardian-aviisa.
– Raporta čájeha movt okta unna jovkkoš mii buvttada fossiila boaldámušaid sáhttá rievdadit máilmmi karbonaluoitima, muitala CDP organisašuvnna teknihkalaš direktevra Pedro Faria.
Climate Accountability Institute lea leamaš mielde almmuheamis raportta Carbon Majord Report.
– Raporta vuosttažettiin čájeha dan ahte klimágássaluoitin vuolgá das go mii ja earát ráhkadit energiija mas lea dálkkádatgássa, dan dihte go dat boldojuvvo ja šaddá juogalágan buvttan, muitala Statoila preassadieđiheaddji Morten Eek Altapostenii.
Kina koallaindustriija buvttada 14.32 proseantta klimágássaluoitimis máilmmis.
Nubbin bajemusas listtus lea saudi-arábalaš oljofitnodat Aramoco 4.5 proseanttain, ja goalmmádin ges ruošša Gazprom-fitnodat 3.91 proseanttain. (©NTB)
