-Almmuhus-
-Almmuhus-
OĐĐASATStatnett ohcá konsešuvnna 420 KV-linjái

Statnett ohcá konsešuvnna 420 KV-linjái

-

-

Statnett čuovvola dál buot golbma mearrádusa Finnmárkku fylkkadikkis juovlamánu rájes. Dat mearkkaša ođđa, stuora vejolašvuođat ealáhusovdáneapmái Finnmárkkus.

– Sáhtán duođaštit ahte čoahkkimis Statnett jođihangottiin ožžon dieđu ahte sii leat jorggihan ja áigot dál ohcat konsešuvnna hukset 420 kV-linjá gaskal Skáiddi ja Vuonnabađa. Sierralohpeohcan lea gesson ruovttoluotta. Boahtá maid huksejuvvot 420 kV-linjá Hámmárfestii lađasin oljobohkanrusttegiid elektrifiseren bargui. Dasa lassin nannejuvvo Skogfossa kapasitehta, dadjá duhtavaš fylk­kasátnejođiheaddji, Ragnhild Vassvik preassadieđáhusas.

 

Servodatoadjebasvuohta ja ođđa vejolašvuođat ealáhusdoibmii

– Finnmárkku fylkkagielddas lea dát leamaš okta dain eanemus vuoruhuvvon áššiin máŋga jagi. Dat ii leat siva haga. Okta 420 kV-linjá addá ealáhusdoibmii einnostahttivuođa ja vejolašvuođa plánet iežaset investeremiid ja ealáskahttit ođđa ideaid. Dasa ­lassin lea linjá dehálaš lađas servo­datoadjebasvuhtii min ássiide, ­čilge Vassvik.

Maŋit áiggi leat sis leamaš máŋga ovdamearkka ahte váráiduhttinsihkkarvuohta ii leat doarvái buorre.

Earret eará Gáŋgaviikkas.

– Mátta Várjjat ruvkke álggaheame geažil ii nagot dálá neahtta ollislaččat doaibmat, ja dat dárbu šaddá ge justa dan maid neaht­ta gierdá gieđahallat. Dat ii leat dohkálaš ássiide nuorta-Finnmárk­kus ja dál viimmat buori­duvvo.


ÁVVUDIT GÁHKUIN: Gáhkku lei diŋgojuvvon Statnett čoahkkimii.
Govva: FFK

 

Čielga diehtu Statnettas

Skábmamánu diibmá lágidii Finnmárkku fylkkagielda, ovttasráđiid Statnettain ja Varanger Kraft AS:in cealkámuškonferánssa.

Dohko serve politihkalaš ja hálddahuslaš jođihangottit ja ealáhusdoaimmat measta buot suohkaniin nuorta-­Finnmárkkus geaidda dát guoská. 

Konferánsa čájehii ahte ealáhusdoaimmas nuorta-Finnmárk­kus leat stuora ambišuvnnat, ja ahte stabiila ja doarvái el-rávdnji lea eaktu ovdáneapmái regiovnnas.

Diehtu Statnett:ai čoakkalmasas lei ovttačilggolaš: Nuorta-­Finnmárku dárbbaha 420 kV linjá!

 

Dehálaš dálkkádatášši

Finnmárkkus leat bieggaresurssat mainna odne ii sáhte ávkkástallat váilevaš neahttakapasitehta haga.

Ođđa neahtas sáhttá ođasmáhtti el-rávdnji nuorta-Finnmárkkus vuvdot industriijai ja golaheddjiide miehtá Norgga, ja maiddái ­fievrridit Eurohpái.

– 420 kV linjá lea maid dehálaš dálkkádatášši. Dat lea guhká leamaš dehálaš ágga. Mis leat leamaš resurssat, muhto ii leat leamaš vejolašvuohta olahit dan márkana. Dál dat rievdá, muitala Vassvik.

 

Giitá Statnetta ja Finnmárkku oktavuođa

Hui ilus fylkkasátnejođiheaddji loahpaha ná:

– Finnmárkku fylkkagielda juohká dan dohkkeheami buot aktevrraiguin geat leat váikkuhan dán vuitui. Dát guoská ovttaskas suohkanii, ealáhusdoibmii, fylkkamánnii ja regiovdnaráđđái. Dát čájeha ahte jus leat fárrolaga, doala­hit njunnošis ja eat ge vuollán, de sáhttá olahit stuora bohtosiid unnán olbmuiguin. Áiggun maid rámidit Statnetta go leat jorggihan. Dan ahte Statnettguldala olbmuid ja váldet vuhtii buriid ákkaid, lea iešvuohta sis mainna galget leat čeavlái. Dá lea illubeaivi olles Finnmárkui ja dál illudit váldit atnui daid vejolaš­vuođaid maid dat addá, loahpaha Vassvik gii ávvuda buriid ođđasiid gáhkuin mas čuožžu ‹‹Fremtiden er elektrisk››.

-Almmuhus-