-Almmuhus-
KULTUVRAStanding Rock ealligovaid bagadalli Michelle Latimer boahtá Anárii

Standing Rock ealligovaid bagadalli Michelle Latimer boahtá Anárii

-

-

Skábmagovaid ávvojagi prográmma lea dál ­almmuhuvvon. Doppe čájehuvvojit earret eará ­Standing Rock ealligovat Rise 1 ja Rise 2. Ieš ­baga­dalli, Michelle Latimer, lea okta dán jagi ­gudnegussiin.

Ođđajagemánus 2018 Skábmagovat álgoálbmogiid ealligovvafestivála lágiduvvo jo 20. geardde. Jagi 2018 fáttát leat Davvi-Amerihkká ja Ellos eallin.

Davvi-Amerihkká oidno min prográmmas nie, ahte mis leat olu oanehisfilmmat ja moadde guhkit filmma ge doppe. Standing Rock -ealligovaid, Rise 1 ja Rise 2, bagadalli, Michelle Latimer lea okta dán jagi gudnegussiin. Mii maiddai čájehit su Rise-ealligovaid min festiválas, muitala Skábmagovaid buvttadeaddji Aleksi Ahlakorpi preassadieđáhusas.

 

Musihkka maiddái

Vaikke Skábmagovat leage ealligovvafestivála, lea prográmmas maid eará ge kultuvra. Sámemusihka násttiin Niillas Holmbergain ja Sofia Jannokiin leat maiddai konsearttat festivála oktavuođas.

Holmberg konsearta lea bearjadaga ovttas estteeanalaš Siiri Sisaskiin Sajosis ja Jannok konsearta fas lávvardaga Skábmagovaid eahketdoaluin Papanas.

 

Ságastallan lávus 

Skábmagovat lágidit ávvojagi gudnin maiddai vuosttas háve Skábmagovaid lávvoságastallama ovttas Yle Sápmiin.

– Ságastallan almmuhuvvo festiválaid áigge Yle Areenas. Ellos eallin -ságastallamis leat fárus miellagiddevaš aktiivvat earet eará Ellos Deatnu -joavkkus. Lávvardaga fas lea sátnefriddjavuohtapánela, masa oassálastet Sofia Jannok ja soapmásat min ­Davvi-Amerihká gussiin, muitala Ahla­korpi.

 

Álgoálbmogiid ealligovat

Vaikke leat ge olu earálágan dáhpáhusat festiválas, oaiveoasis leat goit dán háve, nu go álo ovddal ge, álgoálbmogiid ealligovat. Aboriginála western, Sweet Country, mii lea oažžun bálkkašumiid filbmafestiválain birra máilmmi, oažžu Sámi vuosttas­eahkeda Skábmagovain.

– Sámi ealligovva lea dál leamašan bures oidnosis moadde maŋimuš jagi siste ja leage hui somá oažžut Sámevara lassin maiddai oanehisfilmmaid beallái Sámi bivnnuheamos namaid varraseamos filmmaid.

 

Oanehisfilmmat

Anders Sunna ja Inga Wiktoria Påve ­bálkkašuvvon oanehis animašuvnna lea vejolaš beassat geahččat Anáris ja dien lassin leat maid oanehisfilmmat Marja Helanderis, Per-Josef Idivuomas, Egil Pedersenis, Lada Suomenrinnes ja Katja Gauriloffis, illuda Ahlakorpi.

Skábmagovat álgoálbmogiid ealligovva­festivála lágiduvvo ge Anáris 25.-28.-1-2018 jo guoktelogát geardde.

-Almmuhus-