Åarjelhsaemien Teatere ođasmahttá «Staaloe» čájálmasa ja čájeha dan «Heddabeivviin». Buvttadanjođiheaddji dadjá ahte sidjiide lea dehálaš čalmmustahttit iežaset doaimma Norgga teáhterfestiválas.
Norgga teáhterfestivála «Heddabeaivvit» lágiduvvojit goalmmát gearddi geassemánu 11. beaivvis 18. beaivái Oslos.
Oktiibuot 32 lávdedáiddainstitušuvnna leat festivála duogábealde, dáid searvvis lea Åarjelhsaemien Teatere AS.
– Midjiide lea dehálaš searvat vai beassat čalmmustahttit Åarjelhsaemien Teatere, olusat han eai oba dieđe ge ahte Mátta-Sámi teáhter gávdno. «Heddabeivviin» viežžat maid olu inspirašuvnna boahttevaš bihtáide ja dat lea dehálaš teáhterii. Mii oažžut maid fágalaš máhtu ja vejolašvuođa rekrutteret bargiid ja neavttáriid teáhterii, dadjá Åarjelhsaemien Teatere AS buvttadanjođiheaddji Leammuid Biret Rávdná.
Stálumáinnas ođđa hámis
«Heddabeivviin» čájehit lagabui 40 teáhterčájálmasa.
Dáid leat buvttadan teáhterat mat leat mielde lágideamen festivála.
Åarjelhsaemien Teatere čájeha «Staaloe» bihtá.
– Mii lea ođasmahttimin bihtá mii ovdal lea čájehuvvon sihke Norggas ja Ruoŧas. Stállu, mii lea jalla ja gievra, váldá fárrui eamidis Rovtege oaivegávpogii. Son lea jierbmát ja bastilat go stállu, nu ahte su ii leat álki dájuhit. Dán vuoru lea nieida, iige gánda, gii šaddá dáistalit stálu ja eamida vuostá gáhtten dihte sápmelaččaid, muitala Leammuid Biret Rávdná, gean mielas lea somá vuolgit Osloi.
– Lea somá vuolgit oaivegávpogii iežamet čájálmasain. Muitalusat ja máidnasat leat sápmelaččaid árbi ja dat leat geavahuvvon mánáid bajásgeassimis. Dán áigge eai soaitte buot sámi mánát ja eará mánát gullan dološ muitalusaid, nu ahte dál besset oahpásmuvvat stállui. Bihttá heive gaskal 4- ja 8-jahkásaš mánáide ja ollesolbmuide, lohká son.
Áŋgiruššá mánáid
Teáhterbihtás «Staaloes» lei vuosttaščájálmas Staare 2018 ávvudeamis ja lea ožžon buriid árvvoštallamiid aviissain.
Åarjelhsaemien Teatere buvttadanjođiheaddji Leammuid Biret Rávdná dadjá ahte čájálmas lea váldon bures vuostá.
– Mii leat ožžon buriid árvvoštallamiid aviissain ja «Staaloe» áŋgiruššá mánáid. Mii jearrat mánáin man láhkai sáhttá bihttit stálus, ja muittán ge bures go muhtin 1. luohkkálaš Bådådjos čuožžilii ja čurvii ahte ferte váldit soappi ja časkit stálu. Son hirbmadit vel fáippui gieđaiguin čájehan dihte mo galgá bihttit stálus, boagusta son.
Teáhterbihttá čájehuvvo Det Norske Teateret lávddis sihke geassemánu 14. ja 15. beaivvi.
Sis leat oktiibuot golbma čájálmasa.
