Stállebuvttadeaddji ođđa Deanu šaldái lea dieđihan konkursagáibádusa, dieđiha Stáhta geaidnodoaimmahat preassadieđáhusas.
Polskka stállebuvttadeaddjis Vistal Gdynia SA:s lea huksenšiehtadus ođđa šaldái Deanušalddis oktan Álttá fitnodagain HAK Entreprenør AS.
– Mii leat diehtán ahte fitnodagas leat leamaš ruđalaš váttisvuođas maŋŋá mearkkašahtti táhpa vuosttaš jahkebealis dán jagi. Fitnodaga stivra lea ovdal ohcan nuppástuhttima vealgerievdadeami ja duorastaga sáddejuvvui konkursagáibádusa. Gollá moadde vahku ovdal go konkursagáibádus dahje rievdadeami/vealgesanerema ohcamuš lea čielggaduvvon. Stáhta geaidnodoaimmahagas lea šiehtadus fitnodagain HAK ja Vistal, ja mii eat leat ožžon dieđu makkár váikkuhusat šaddet šiehtadusas go okta dáin fitnodagain lea reastaluvvan, dadjá Kaare Ramberg Stáhta geaidnodoaimmahagas.
Árvvoštallet dilálašvuođa
Huksenbáikái Detnui leat boahtán muhtin stálleoasit maid leat plánen cegget fargga. Lea ain sullii guokte jagi huksenáiggis, ja prošeaktajođiheaddji doaivu ja sávvá ahte lea vejolaš rahpat dan ođđa šalddi 2019 čavčča.
– Oktan kontráktaoasálaččain árvvoštallat dilálašvuođa, ja vahku dahje guokte vahku geahčin lea dilálašvuohta čielgan dán áššis, dadjá Kaare Ramberg.
Polenis lea okta advokáhtta bálkáhuvvon čielggadit dilálašvuođa ja son lea šiehtadallamin báŋkkuin váldit badjelasas stálli.
