Sámedikki presideanta Aili Keskitalo dieđuid mielde lea stáhtaráđđi odne dohkkehan Deanu soahpamuša. Keskitalo lohká ahte dál áigu Sámediggi bidjat návccaid Stuoradikki bellodagaiguin gulahallát, vuoi Stuoradikkis eai dohkket soahpamuša.
Sámedikki presideanta Aili Keskitalo dieđuid mielde lea stáhtaráđđi odne dohkkehan Deanu soahpamuša. Keskitalo lohká ahte dál áigu Sámediggi bidjat návccaid Stuoradikki bellodagaiguin gulahallát, vuoi Stuoradikkis eai dohkket soahpamuša.
Odne lea stáhtaráđđi dohkkehan Norgga ja Suoma Deanu čázádaga soahpamuša.
Sámedikki presideanta Aili Keskitalo lea hirpmástuvvon go bahkkehit dán soahpamuša masa lea nu stuora báikkálaš vuosteháhku:
– Mii leat viggan čilget ráđđehussii ahte ii leat jierpmálaš dohkkehit dán soahpamuša, go lea nu stuora báikkálaš vuosteháhku soahpamuša vuostá. Mii leat ávžžuhan sin geahččalit gávdnat eará čovdosiid, árvvoštallat áššiid buorebut ja geavahit áiggi dasa. Muhto sii eai leat beroštan Sámedikki oainnus, Fylkkadikki oainnus, Kárášjoga ja Deanu gielddaid oainnus, Deanočázádaga guolástushálddahusa oainnus ja Suoma Sámedikki oainnus, lohká son.
Ášši galgá Stuoradiggái
Presideanta oaidná ahte dál lea Sámedikkis bargu Stuoradikki bellodagaide čilget manne eai galgga Stuoradikkis dohkkehit dán soahpamuša.
– Lihkkus ášši ii leat loahpalaččat mearriduvvon ovdal lea dohkkehuvvon Stuoradikkis. Mii boahtit váldit oktavuođa iešguđetge bellodatjoavkkuiguin Stuoradikkis ja čilget manne mii oaivvildit dan ahte dát šiehtadus ii berre dohkkehuvvot, čilge Keskitalo.
Ii leat vel čielggas goas ášši galgá Stuoradiggái, muhto Ráđđehusas lea sávaldat ahte galgá dán jagi. Jus soahpamuš dohkkehuvvo, de dat doaibmagoahtá 2017 rájes.
