Deanučázádaga Guolástanhálddahusa stivrajođiheaddji Steinar Pedersen goziha ahte buot mii guoská Norgga ja Suoma soahpamuša šiehtadallamiidda ja evttohuvvon soahpamuša, šaddá riekta. Nu maid go stáhtaráđđi sáddii breava Finnmárkku Stuorradikke áirasiidda.
Deanučázádaga Guolástanhálddahusa stivrajođiheaddji Steinar Pedersen goziha ahte buot mii guoská Norgga ja Suoma soahpamuša šiehtadallamiidda ja evttohuvvon soahpamuša, šaddá riekta. Nu maid go stáhtaráđđi sáddii breava Finnmárkku Stuorradikke áirasiidda.
Finnmárkku stuorradikkeáirasat leat ožžon breava Dálkkádat- ja Birasdepartemeantta ministaris Vidar Helgesen, sáddejuvvon čakčamánu 27. beaivvi, mas dieđiha mo Norga ja Suopma lea evttohan Deanočázádaga ođđa bivdosoahpamuš galgá leat.
Deanučázádaga Guolástanhálddahusa (DG) stivrajođiheaddji Steinar Pedersen lea ožžon dan golbma siidosaš breava ja lea cuigon 14 cealkaga mas ministtar meaddá ja sádden daid Finnmárkku Stuorradikkeáirasaiidda.
– Buot vearrámus meattáhus lea ahte stáhtaráđđi Helgesen čállá ahte DG leamaš mielde buot šiehtadallančoahkkimiin. Dat ii doala deaivása, iige eisege doala deaivása ahte ođđa DG jođihangoddi lea skábmamánu 2015s dorjon dien árvalusa. Stáhtaráđđi ii leat ožžon rivttes dieđuid, lohká Deanučázádaga Guolástanhálddahusa (DG) stivrajođiheaddji Steinar Pedersen.
Reivves čállá stáhtaráđđi earret eará ahte su mielas lea ovdamunni ahte bartaeaiggádat Suoma bealde maid oččošedje bivdovuoigatvuođaid go sii han ain leat turistabivdit.
Pedersen čilge Stuorradikkeáirasiidda ahte dat ii atte bivdovuoigatvuođa Norgga bealde, ja vaikke leažža turistabivdit, de ožžot seamma vuoigatvuođaid go báikeolbmot ja hálbbit bivdokoarttaid.
Buoremus hilgut soahpamuševttohusa
Finnmárkku Ovddádusbellodaga Stuorradikke áirras Jan-Henrik Fredriksen lohká son ii sáhtte lohkat gii lei makkár čoahkkimis go son ii lean doppe.
– Munnje lea politihkkalaččat eanet dehálaš ahte go olles Finnmárkku beaŋka háliida hilgut Norgga ja Suoma ođđa soahpamuševttohusa Deanučázádahkii, de dat deaddá eanemusat. Mii háliidat geahpedit luossabivddu Deanočázádagas, muhto min mielas ii leat rivttes čoavddus addit 3.600 ođđa birrajándorkoartta. Dáh!, bivdde nu olu go háliidat. Juohkehaš ádde dat han lasiha bivdodeattu Deanočázádagas. Duohtavuohta lea ahte mii buohkat háliidat ahte deanuluossa ain gávdnošii boahttevaš buolvvaide, lohká Finnmárkku Ovddádusbellodaga Stuorradikke áirras Jan-Henrik Fredriksen.
Čiŋahuvvon dieđuid ožžon
Steinar Pedersen lohká son ii ádde gos ministtar lea háhkan daid boasttu dieđuid maid lea sádden Stuorradikke áirasiidda.
Pedersen lohká son rávvešii stáhtaráđđi ieš guorahallat ášši ođđasit ja vuđolaččat.
– Mu mielas lea hui šállošahtti, in ge liiko oppanassii ge ahte DG jođiheaddjin šattan dadjat ahte stáhtaráđđi buktá boasttu dieđuid. Dat ii leat somá, ii álggage. Muhto go dahká dan, de ferte dieđusge dadjat dan, lohká DG stivrajođiheaddji Steinar Pedersen.
Pedersen muitala son lea čujuhan Helgesen breavas meattáhusaid ja sádden daid Finnmárkku Stuorradikkeáirasiidda go sii moadde vahku áigi čálle breava stáhtaráđđái ja dorjo Deanuleagi báikeolbmuid.
