-Almmuhus-
-Almmuhus-
OĐĐASAT Stáhtaministtár luoitá vuođđogeađggi

Stáhtaministtár luoitá vuođđogeađggi

-

-

Stáhtaministtar Erna Solberg luoitá FeFo ođđa hálddahusvistti vuođđogeađggi. Dat dáhpáhuvvá beaivvát ala, logi jagi maŋŋil go Finnmárku sirdojuvvui Finnmárkulaččaide.

Vuođđogeađggi luoitin lea biddjon suoidnemánu 1. beaivái ja álggaha almmolaččat Finnmárkkuopmodaga logijagiávvudeami. Seremoniija lea ođđa vistti huksensajis, Leavnnja guovddážis.

 — Mii leat hui ilus go stáhtaministtar čájeha midjiide dan gutni ja dahká dan symbolalaš doaimma. Dan lea dan barggu dohkkeheapmi maid FeFo doaimmaha Finnmárkku ássiid bealis, dadjá direktevra Jan Olli.

 

Lágidit konferánssa

Seamma beaivvi lágida FeFo konferánssa barggu birra mii buvttihii Finnmárkkulága ja Finnmárkkuopmodaga ásaheami, ja luotta birra ovddasguvlui. Logaldalliid gaskkas leat Erna Solberg, sámediggepresideanta Aili Keskitalo, Ole Henrik Magga, Odd Einar Dørum, Knut Storberget, Helga Pedersen ja Sven-Roald Nystø. Ávvudanbeaivi loahpahuvva doaimmaiguin Leavnnjas ja konsearttain eahkes.

 — Mii sávvat oallugiid boahtit kultursálii geahččat ja gullat dan dramáhtalaš áiggi birra ovdal go láhka mearriduvvui, ja dan birra mii geavai birrasis, ja Finnmárkku boahtte áiggi birra FeFo:in, lohká Olli.

 

Huksegohtet dán čavčča

Ođđa hálddahusvistti huksegohtet dán čavčča, ja plána mielde galgá váldot atnui jagi maŋŋil. Hálddahusvisttis lea gollorámma 48,2 milliuvnna, ja areála lea 930 kvadráhtamehtera.

FeFo hálddaša 95 proseantta Finnmárkku eatnamiin fylkka ássiid bealis Finnmárkkulága ulbmila ja njuolggadusaid mielde. Areála lea su 46.000 kvadráhtakilomehtera. FeFo stivrras leat guhtta olbmo geat ásset Finnmárkkus. Stivra jođiha FeFo. Sámediggi ja fylkkadiggi nammadeaba goabbáge golbma áirasa stivrii.

- Advertisement -
-Almmuhus-