-Almmuhus-
OĐĐASAT Stáhtaministtar Erna Solberg: – Mii leat ovttas

Stáhtaministtar Erna Solberg: – Mii leat ovttas

-

-

– Dál lea deháleappot go goassige ovdal ahte mii leat ovttas ja doarjut guđet guimmiideamet, čállá stáhtaministtar Erna Solberg dán kronihkas.

Olbmot plánejit miehtá Norgga earálágan beassážiid coronaleavvama geažil. Dál lea deháleappot go goassige ovdal ahte mii leat ovttas ja doarjut guđet guimmiideamet.

Ráđđehus lea mearridan viiddis gearggusvuođaplánaid vai nagodat roasuid hálddašit. Seammás lea váttis ovddalgihtii einnostit mo dat váikkuha servodahkii go giddet buot skuvllaid, mánáidgárddiid, kinoi ja vuoktačuohppifitnodagaid.

Dál diehtit mo dilli lea go Norga lea giddejuvvon. Mii leat beassan dovdat mo dat lea go fertet doallat unnimusat ovtta mehtera gaskka nubbái. Ja beassan vásihit mo dat lea go mánnái ferte čilget ahte mii eat sáhte áhku ja ádjá galledit.

Mii leat buohkat dál eanaš áiggi ruovttus. Mii mátkkoštat dušše go fertet. Hušas gávpešiljuin baljo eai oidno olbmot. Barttat leat gurrosat beassášluomus.

Áigi gaskal pálbmasotnabeaivvi ja vuosttaš beassášbeaivvi gohčoduvvo jaskesvahkkun. Dán jagi dat šaddá jaskadeamos vahkku maid mii goassige leat vásihan. Ja dasa lea buorre ágga.

Jos coronavirus livčče beassan leavvat nu johtilit go dat leavai ovdal go álggaheimmet doaibmabijuid hehttet njoammuma, de livčče Norggas sullii 2700 olbmo šaddan buohccevissui coronavirusa geažil beassášáiggi. Ja ollugat dárbbašit heahteveahki eará sivaid geažil. Dávddat nu go váibmodohppehat ja johtolatlihkohisvuođat eai váldde bottu. Dat galget maid oažžut veahki ja divššu.

Mii eat sáhttán dan diktit dáhpáhuvvat ahte dearvvašvuođaásahusat gártet heahtedillái, ahte olbmot eai oaččo veahki ja ahte olbmot jápmet.

Danne lea doaibmabijuide dárbu.

Ain stuora eahpesihkkarvuohta 

Nu go buot earát, de háliidan mun ge ahte mii nu johtilit go vejolaš oažžut árgabeaivámet ruovttoluotta. Mun jáhkán ahte mii leat ollugat geat árvvusatnit árgabeivviid ain eanet maŋŋil go njoammunvárra lea nohkan.

Muhto muhtun bearrašiidda dáidá leat nu ahte árgabeaivi ii šatta goassige nu go ovdal.

Norggas leat ollu bearrašat geat leat morrašis go leat massán ovtta sin ráhkkásepmosa coronadávdda geažil. Ja dilli dovdo vel losibun go ii beasa lagamuččaiguin leat ovttas.

Ollugat vásihit man garrasit coronavirus čuohcá ja maid dat mielddisbuktá. Muhtumat leat ieža duođalaččat buohcamin, dahje earát bearrašis ja ustibiin.

Ollugat dovdet áŧestusa, balu ja eahpesihkkarvuođa dáid vahkuid. Dan ipmirdan bures.

Mii oaidnit govaid miehtá máilmmi. Mii oaidnit mii Italia buohcceviesuin dáhpáhuvvá go menddo ollu olbmot buohccájit oktanaga. New Yorkas huksejuvvo gaskaboddosaš buohcceviessu Central Parkii. Coronavirus dagaha stuora ekonomalaš váttisvuođaid miehtá máilmmi. Dat váikkuha maid Norgga fitnodagaide ja bargosajiide.

Dat mielddisbuktá ahte ollugat ballagohtet. Ballet ahte muhtun gean sii ráhkistit buohccá duođalaččat. Sii ballet biddjomis virgelupmui, barggu dahje fitnodaga massimis. Ollugat leat bargguheamit, ja dovdet eahpesihkkarvuođa ekonomiija ja boahtteáiggi hárrái.

Ráđđehus lea ráhkadan ollu ekonomalaš doaibmabijuid dusten dihte duođalaš ja gáibideaddji dili mas mii dál leat, sihke ovttaskas olbmot, stuora ja smávva fitnodagat. Dan dahkat vai sáhttit veahkehit dan dilis mas mii dál leat ja guhkit áiggi.

Almmatge lea nu ahte mii fertet buohkat eallit eahpesihkarvuođas, go eat dieđe man guhká mii šaddat eallit dán dilis.

Jos vel dilli lea ge ain hui eahpečielggas, de čájehit ođđaseamos logut ahte lohku sis geat šaddet buohccevissui lea njiedjagoahtán, mii muitala ahte manná rivttes guvlui. Muhto, dál lea vuos menddo árrat oadjut. Doaibmabijut mat dál leat jođus bistet gitta cuoŋománu 13.beaivái, ja áigi ferte čájehit doibmet go doaibmabijut doarvái bures. Doaibmabijuid ii sáhte ložžet ovdalgo diehtit man bures mii lihkostuvvat hehttemis virusaleavvama. Ii oktage mis sáhte dan vástidit dál.

Hirpmahuvvan go lehpet nu gierdevaččat 

Min árgabeaivi lea jorgaluvvon vulosoivviid ja beaivvit eai leat šat nu go ovdal. Ollu maid mii ovdal barggaimet lunddolaččat ii leat šat lohpi bargat. Olbmuide lea hui gáibideaddji go galget čuovvut garra gáibádusaid guhkit áiggi. Mun ipmirdan ahte dat váibadahttá.

Muhto, mun lean hirpmahuvvan go lehpet nu gierdevaččat.

Háliidan giitit din buohkaid giliin ja gávpogiin miehtá riikka go nu gierdevaččat ja oamedovddolaččat čuovvubehtet njuolggadusaid. Dat gáibida ollu juohkehaččas. Ja dat gáibida mis maid ollu dego servodahkan.

Ovttas mii galgat nagodit.

Earálágán beassážat

Dál šaddet earálágan beassážat. Ollugat eai beasa ávvudit beassážiid barttas duoddaris dahje mearragáttis, nu go ovdal. Eai šatta guhkes čuoiganmátkkit lávka sealggis gos lea appelsiidna ja kakáo, ja eatge beasa ráhkkanit geassái nu go ovdal.

Dan duođalaš dilis mas mii dál leat de várra diet ii mearkkaš nu ollu. Muhto luomut gos beassat suohtastallat, mátkkit ja luondduvásáhusat leat dáhpáhusat maidda mii guhká illudat, ja maid mii guhká muittašat go árgabeaivi boahtá. Beassážiid mii ovttastallat bearrašiin, čatnat oktavuođaid ja nannet árbevieruid. Ollugat golahit áiggi buoremusat iežaset barttas.

Jos vel maŋimuš vahkut leat ge addán midjiide ollu vuorjašumiid, de leat dat maid addán midjiide buriid: Ustitvuođa, oktavuođa ja solidaritehta.

Eaktodáhtolaš organisašuvnnat muitalit ahte gávdnojit ollu olbmot geat háliidit veahkehit. Eaktodáhtolašsuorgi lea leamaš jođán addit bálvalusaid ja báikkálaš gearggusvuođafálaldagaid doppe gos olbmot ásset. Dearvvašvuođabargit háliidit veahkehit, oahpaheaddjit fuomášit hutkás digitála čovdosiid, ránnját veahkehit gávppašit ja beatnaga finahit olgun.

Mii oaidnit guđet guoibmámet, ja veahkehat. Dál beassat mii farga vásihit jaskadeamos vahku maid mii goassige leat vásihan. Danne lea deháleappot go goassige ovdal, ahte mii ain beroštat guđet guoimmisteamet.

Mii galgat earáid movttiidahttit ahte min ovddabealde bohtet buoret beaivvit.

Buohkat galget veahkehit vai oažžut árgabeaivámet ruovttoluotta.

Dál beassat mii farga vásihit jaskadeamos vahku maid mii goassige leat vásihan. Danne lea deháleappot go goassige ovdal, ahte mii ain beroštat guđet guoimmisteamet.


Stáhtaministtar Erna Solberg

Sámás:  Gieldda- ja ođasmahttindepartemeanta 

- Advertisement -
-Almmuhus-