Norgga stáhtaministtar lea válljen gova iežas juovlakortii ja čálligoahtán 700 koartta.
Norgga stáhtaministtar lea válljen gova iežas juovlakortii ja čálligoahtán 700 koartta.
Juohke jagi mearriduvvo vuorbbi bokte guđe fylkkas stáhtaministtar vállje gova iežas juovlakortii.
Dán jagi gesii Oslo fylkka, ja dalle ávžžuhuvvojedje oaivegávpoga astoáiggegovvideaddjit sáddet árvalusaid juovlakortii.
Oktiibuot oaččui stádaministtar Erna Solberg 198 dálvegova Oslos.
– Máilmmi čáppa govat árvaluvvojit dán jagi juovlakoartan, ja háliidan giitit go ná oallugat sáddejedje iežaset govaid munnje, lohká stáhtaministtar preassadieđáhusas.
Čáppa dálvebeaivi
Son válljii loahpas Haakon Christensena gova mii lea váldon Vigeland-párkkas muhtin čáppa dálvebeaivvi.
Muohta lea gokčan eatnama ja beaivvádat goardá.
– Gávdnojit hui olu fiinna govat mat leat govviduvvon Vigeland-párkkas, muhto dása liikojin erenomáš bures mihtilmasvuođa ja miellalági geažil, dadjá stádaministtar, guhte lea čálligoahtán 700 juovlakoartta maid sádde earret eará stáhtaráđiide, stuoradiggepolitihkkáriidda ja olbmuide geaiguin lea deaivvadan dán jagi.
Diimmá juovlakoarta lei govviduvvon Davvi-Trøndelágas ja ovddit jagi koarta ges Aust-Agderis.
