Go Gielda- ja Ođasmáhttindepartemeanta ohcá stáhta virggiide olbmuid, de sii háliidit olihit viidát. Dál lohpida šaddat čeahpibun almmuhit sámi aviissaide maid.
Go Gielda- ja Ođasmáhttindepartemeanta ohcá stáhta virggiide olbmuid, de sii háliidit olihit viidát. Dál lohpida šaddat čeahpibun almmuhit sámi aviissaide maid.
Mannan vahku čáliimet Ságat redaktevrra, Geir Wulff, birra go son cuiggodii Gielda- ja ođasmahttindepartemeantta (GOD) go eai almmut stáhtavirggiid sámi aviissain.
Wulff válddii ovdamearkan go GOD ii almmuhan fylkkamánnevirggi sámi aviissaid, Ávvira ja Ságat aviissa bokte.
– Dat lea badjelgeahččanvuohta stáhta bealis, dajai son dalle Ávvirii.
Máŋggabealátvuođa
GOD stáhtačálli, Paul Chaffey, čilge dál Ávvirii ahte sii eai badjelgeahča sámi aviissaid.
Sii háliidit baicca máŋggabealatvuođa olihit go ohcet stáhta virggiide olbmuid, nu go dán oktavuođas Finnmárkku fylkkamánni virgái.
– Mii geahččalit olihit máŋggabealatvuođa go ohcat diekkár virggiide olbmuid, lohká son.
Vuogádat
Chaffey muitala ahte sii leat čuvvon dan vuogádaga movt lea leamaš dábálaš almmuhit dieid virggiid, ja sis lea ráhkaduvvon vuogádat movt ohcat olbmuid, nu go fylkkamánnevirgái.
Paul Chaffey deattuha Ávvirii ahte dat almmuhus lea leamaš sámegillii, ja dál son lohpida liikká geahččat movt galget buorebut dán vuogádaga dahkat ja čállá e-poasttas Ávvirii:
– Almmuhus lea leamaš sihke sámegillii ja dárogillii neahttabáikkiin mat eanemusat adnojit, nu go regjeringen.no ja finn.no.
– Mii fertet dieđusge čeahpibun šaddat almmuhit vai leat sihke dáru ja sámi aviissain báikkálaččat dákkár almmuhusat, ja mii fertet árvvoštallat movt mii dan galgat dahkat boahtteáiggis, lohká Chaffey.
