Sámi guovddášguovlun gohčodit guovlluid gos sámegiella dávjá lea eanetlogugiella, ja gos sámi kultuvra ja eallinvuohki leat nannosat ja guovddážis servodagas. Sámedikki barggus ii leat doaba guovddášguovlu mearriduvvon kategoriija, muhto dat lea juoga maid servodagas ipmirdit.
Finnmárkku politiijaguovllus lea leamaš prošeaktajoavku mii lea árvalan gosa Stáhta mánáidviesu galgá ásahit Finnmárkkus. Sámediggi lea leamaš čoahkkimis prošeaktajoavkkuin, mas čilgiimet juste dan ahte doaba ii leat kategoriija man Sámediggi lea mearridan. Go mii leat gulahallan prošeaktajoavkkuin, de eat leat árvalan gosa mánáidviesu galggašii ásahit. Mii leat baicce čielgasit muitalan man dehálaš lea ahte fálaldat heive ja lea olámuttus sámi mánáide.
Midjiide lea earret eará leamaš dehálaš ahte dat lea báikkis gos lea buorre vejolašvuohta atnit sámegiela, ja gos bures ipmirdit ahte mánás lea sámi kultuvra ja duogáš. Danne lea dehálaš ahte báikkis gosa sámi mánáidviessu ásahuvvo lea relevánta sámi biras gos lea fágagelbbolašvuohta.
Dulkon ahte Stuoradikki mearrádusa duogážin lea sihkkarastit dan ahte go sámi mánát deaivvadit politiijain, de dáhpáhuvvá dat dohkálaš láhkai. Jus dan galgá sihkkarastit, de munnje lea čielggas ahte Stáhta mánáidviessu Finnmárkkus ferte leat báikkis gos sámegiella ja sámi kultuvra leat lunddolaš oassin sihke servodagas ja relevánta fágabirrasiin. Stuoradikki mearrádusa áigumuša ja sámi mánáid dárbbuid vuođul lea váttis jurddašit ahte mánáidviesu lea heivvolaš ásahit báikkiide mat eai leat sámi hálddašanguovllus.
Midjiide lea čielggas ahte áidna čoavddus go galgá sihkkarastit dohkálaš sámi fágabirrasa mas lea sámi giella- ja kulturgelbbolašvuohta, lea ahte mánáidviessu ásahuvvo muhtun sámi giellahálddašansuohkanii.
Runar Myrnes Balto (NSR), sámediggeráđđi
Sámediggi ii leat searvan digaštallamii dan birra gos mánáidviessu galgá leat go lea gulahallan politiijain. Mii eat leat dohkkehan ahte dan ásahit báikái mii ii leat sámi hálddašanguovllus. Danne imaštalan sakka go Finnmárkku politiijaguovlu čujuha gulahallamii Sámedikkiin go leat mearridan ahte mánáidviessu galgá leat Álttás.
Midjiide lea čielggas ahte áidna čoavddus go galgá sihkkarastit dohkálaš sámi fágabirrasa mas lea sámi giella- ja kulturgelbbolašvuohta, lea ahte mánáidviessu ásahuvvo muhtun sámi giellahálddašansuohkanii.
Dát lea mis vuođđun go bargat áššiin viidáseappot, ja sámediggeráđđi áigu bivdit konsultašuvnnaid sihke sisdoalu birra ja dan birra gosa mánáidviessu ásahuvvo. Sámi mánát ánssášit váldojuvvot vuostá iežaset gillii, ja ahte fágabargit ipmirdit sin kultuvrra ja sámi duogáža.
