-Almmuhus-
OĐĐASAT– Stáhta Loatnakássa ii dohkkehan oahppoduođaštusa sámegillii

– Stáhta Loatnakássa ii dohkkehan oahppoduođaštusa sámegillii

-

-

Guovdageaidnulaš Espen Eira imaštallá manin stáda ásahus ii dohkket dokumeanttaid sámegillii vaikke sámegiella lea almmolaš giella Norggas.

Go Espen Eira gergii oahpaheaddjioahpus Sámi Allaskuvllas, de bivddii Stáhta Loatnakássa sihkkut 50.000 ruvnnu su loanas.

Sus ja eará oahpaheaddjistudeanttain lea dát riekti go gazzet 60 oahppočuoggá sámegielas.

 

Imaštallá ortnega

Eira sáddii oahpahusduođaštusa Stáhta Loatnakássii, muhto sii eai sáhttán gieđahallat ášši go duođaštus lei sámegillii.

– Moadde beaivvi maŋŋel vástidedje ahte fertejin oažžut oahppoduođaštusa dárogillii. Mu mielas lea ártet go stáhta ásahus dán gáibida go Norggas han leat guokte almmolaš giela, lohká son.

 

Geargan áššiin

Espen Eira šattai Sámi Allaskuvlla bivdit duođaštit nuppes ahte lea čađahan oahpaheaddjioahpu.

Go Stáhta Loatnakássa oaččui duođaštusaid dárogillii, de čoavdašuvai ášši.

– Dál lean geargan áššiin. Das eai leamaš makkár ge stuora váikkuhusat munnje, muhto in leat gal gullan sullasačča ovdal, lohká Eira gii dál bargá oahpaheaddjin Guovdageainnu mánáidskuvllas.

 

Dábálaš váttisvuohta

Sámi Allaskuvllas duođaštit ahte šaddet sáddet ođđa oahppoduođaštusaid dárogillii Stáhta Loatnakássii duollet dálle.

Rektor Gunvor Guttorm dadjá dán maiddái muđui vásihit.

– Mii hui dávjá vásihit ahte oažžut reivviid ruovttoluotta jus sáddet daid dušše sámegillii, sii dáhtot daid maiddái dárogillii, lohká Guttorm.

 

Ášši joatkašuvvá gova vuolábealde.


Sámi Allaskuvlla rektor Gunvor Guttorm. Vuorkágovva: Sárá Máret Rávdná Oskal

Boastut duvdit ovddasvástádusa ohccái

Rektor ii kommentere ovttaskas ášši, muhto lohká imašlažžan go Stáhta Loatnakássa duvdá ovddasvástádusa studeanttaide.

– Norggas lea lohpi čállit sihke sáme- ja dárogillii. Mun ádden váttisvuođa go eai ádde sámegiela, muhto ovddasvástádusa eai galggašii duvdit ohccái. Dákkár dilálašvuođain galggašedje vaikke riŋget midjiide vai eai duvdde čuolmma ovttaskas olbmuid, lohká Sámi Allaskuvlla rektor Gunvor Guttorm.

 

Eai gula sámegielaid hálddašanguvlui

Stáhta Loatnakássas dadjet ahte sii eai leat geatnegáhtton vástidit sámegillii.

– Stáhta Loatnakássa ii gula sámegielaid hálddašanguvlui, danin eat leat geatnegáhtton vástidit sámegillii, lohká gulahallandirektevra Anne-Berit Herstad.

Son dadjá maid ahte lávejit dábálaččat gulahallat skuvllain.

– Mii šállošat go dan eat leat dahkan dán áššis. Mii háliidat buori gulahallama oahppobáikkiiguin ja iežamet geavaheddjiiguin. Mii váldit oahpu dán áššis, lohká Herstad.

-Almmuhus-