Seailluhan dihtii bieggamilluid, de stáhta lea evttohan ahte boazodoallu sáhttá fárret eret Fovsennjárggas, muhto dan evttohusa hilgot Fovsen-sámit. – Ii leat beroštupmi dasa, lohká advokáhta Jon A. Lange.
Norgga stáhta attii bieggafápmofitnodagaide lobi cegget Fovsennjárgii Davvi-Trøndeláhkii 151 bieggaturbiinna Mátta-Fovsen ja Davvi-Fovsen boazoorohagaid guohtuneatnamiid ala. Dás šattai riidu ja beannot jagi dás ovdalis, 11.10.2021, celkkii Alimusriekti Fovsen-áššis duomu ahte bieggamilluid-konsešuvnnat leat lobiheamet.
Dan rájes lea Oljo- ja energiijadepartemeanta (OED) geahččalan beassat eret duomu váikkuhusas. Davvi-Fovsena siidda advokáhtta Jon A. Lange muitala Nationen-aviisii ahte ráđđádallamat stáhta ja sámiid gaskkas lea dego sirdit bávtti. Lohká su mielas orru leamen OED dán áššis áigumin hástalit Norgga fápmojuohkinprinsihpa.
Mátta-Fovsena sámiid advokáhtta Andreas Brønner lohká nu mo sii leat ádden, de ii áiggo stáhta njeaidit bieggamilluid, muhto lea ohcamin ođđa guohtumiid eará guovlluin go Fovsenis, sirdin dihtii sápmelaččaid. Advokáhta guovttos lohkaba orohagat eai áiggo gosage fárret, eaige háliit bákkuin fárret eret.
Sámediggepresideanta Silje Karine Muotka (NSR) lohká ON eamiálbmotjulggaštus lohká eamiálbmogiid ii oaččo bákkuin sirdit eret iežaset guovllus. Iige Muotka jáhke stáhtii lea vejolaš maidege bargat jus boazodoallit eai mieđa dasa.
Advokáhtta Jon A. Lange jáhkká stáhta ballá bieggamillofitnodagat stevdnejit stáhta jus eai oaččo ođđa konsešuvnna. Lange sávvá stáhtaministtar Støre ii leat dohkkehan OED láhttema go Hurdalsplattforpmas dadje ahte Norga galgá leat ovdagovva eamiálbmogiid vuoigatvuođaid ektui.
Nationen ii leat ožžon kommentára, ii stáhtaministara kantuvrras, iige OED stáhtačállis.
