Odne buvttii Stáhta fálaldaga NBR:ii, mii lei ollu unnit go maid ledje vuordán. Lihkká lohká šiehtadallanlávdegotti jođiheaddji Inge Even Danielsen sin diehtán ahte eai sáhttán vuordit nu stuorra lasáhusaid.
Odne buvttii Stáhta fálaldaga NBR:ii, mii lei ollu unnit go maid ledje vuordán. Lihkká lohká šiehtadallanlávdegotti jođiheaddji Inge Even Danielsen sin diehtán ahte eai sáhttán vuordit nu stuorra lasáhusaid.
Gáibádusa rámma lea 141,65 milliuvnna ruvnno, mii lea 28,65 milliuvnna ruvnno lasáhus, dálá šiehtadusa ektui mii lea 113 milliuvnna ruvnno.
Vel unnit
Odne buvttii ges Stáhta iežas fálaldaga NBR:ii, mii lea 111,5 milliuvnna ruvnnu. Fálaldat lea badjel 30 milliuvnna unnit go gáibádus ja maiddái 1,5 milluvnna ruvnnu unnit dálá šiehtadusa ektui.
Behtton
Inge Even Danielsen lohká iežaset behtton, muhto seammás ledje ráhkkanan dákkár fálaldahkii, go ledje ožžon dan guvlui signálaid go geigejedje gáibádusa.
– Dat lea diehttelas veahá heittot, muhto seammás diđiimet ahte eat sáhte vuordit nu ollu, dovddasta son.
Hábmet vástádusa
Danielsen lohká sis galgat dán vahkkuloahpa stivrračoahkkin, gos galget hábmet vástádusa fálaldahkii ja ráhkkanišgoahtit viidásat šiehtadallamiidda.
– Dasa lassin leat mii bovden báikkálašservviid jođiheddjiid sierra čoahkkimii, ovdal go hábmet vástádusa fálaldahkii, dadjá son.
NBR ja Eanandoallodepartemeantta jotket šiehtadallat, ođđa boazodoallošiehtadus galgá sohppon guovvamánu loahpas.
