Fovsen guovllu lullisámit ballet ahte bieggamillopárkkat dagahit ahte Fovsen boazodoallu nohká go eai juksan mieđiheami árvvoštallanrievttis bissehit bieggafápmorusttega huksenplánaid Storheias.
– Morašlaš riektemearrádus olles Lullisámi kultuvrii ja gillii. Fovsen lea okta dain stuorámus bieggafápmorusttethuksemiin ja mielddisbuktá stuorra negatiiva váikkuhusaid guovllu boazodollui, dadjá sámediggepresideanta Vibeke Larsen.
Ballet boazodoalu nohkkomis
Ain lea guovllu boazodoallu hui deaŧalaš lullisámegiela ja Lullisámi kultuvrra seailluheapmái. Nu go mii diehtit, de atná ON lullisámegiela okta dain eanemusat áitojuvvon gielain máilmmis.
– Sámediggi lea moaitán ja ain moaitá bieggafápmohuksema Fovsen njárggas go das sáhttet leat stuorra negatiiva váikkuhusat Lullisámi kultuvrii. Stáhtas lea ovddasvástádus das ahte kultuvra lea ealas ja ceavzil. Go stáhta eiseválddit dál leat suovvan dan stuorra bieggamillohuksema, de sii leat bidjan ain stuorát ovddasvástádusa sihkkarastit ahte boahttevaš huksemat guovllus eai eanet hedjonahte boazodoalu birgenlági, dadjá Larsen.
Jávkadit giela
Buot boahttevaš huksemiid oktavuođas fertejit eiseválddit, plánejeaddjit ja huksejeaddjit bidjat álbmotrievttálaš eavttuid vuođđun. Dan ollašuhttimii fertejit viežžat miehtama boazodolliin ovdal go addet lobi ođđa sisabahkkemiidda. Dalle eastadivčče eanet sisabahkkemiid deaŧalaš guohtuneatnamiidda mii lea mearrideaddji eaktun Lullisámi boazodoalu seailluheapmái.
– Jus stáhta ii lihkostuva dainna, ii ge nagot dahje hálit bissehit guohtuneatnamiid goarideami, de šaddet Fovsen guovllu lullisámiid sánit duohtan. Dalle massá rašis Lullisámi kultuvra ceavzilvuođas, ja stáhta ferte váldit badjelasas ovddasvástádusa das ahte jávkaduvvo okta máilmmi eanemusat áitojuvvon gielain, dadjá Larsen.
