Ávviris leat dieđut main Eanandoallo- ja biebmodepartemeanta evttoha ođđa njuolggadusa Boazodoallolága 60. paragráfii, mii addá stáhtii válddi mearridit juohke siidaoassái boazologu viđa jahkái.
Ávviris leat dieđut main Eanandoallo- ja biebmodepartemeanta evttoha ođđa njuolggadusa Boazodoallolága 60. paragráfii, mii addá stáhtii válddi mearridit juohke siidaoassái boazologu viđa jahkái.
Ihttin ráđđádallet Eanandoallo- ja biebmodepartemeanta, Norgga Boazosápmelaččaid Riikkasearvi (NBR) ja Sámediggi boazodoallolága 60. paragráfa birra.
Ávviris lea oassi ráđđádallandokumeanttas mas boahtá ovdan ahte stáhta evttoha lassi njuolggadusa boazodoallolága 60. paragráfii, mii addá stáhtii válddi mearridit boazologuid juohke siidaoassái.
Dat mearkkaša ahte fylkkamánnit galget beassat mearridit juohke siidaoassái boazologu daid orohagain dahje siiddain main boazolohku lassána eambbo go vihtta proseantta ja ieža eai nagot ráhkadit unnidanplánaid.
Fylkkamánnái maid evttohuvvo váldi «galmmihit» bajimus boazologuid juohke siidaoassái viđa jahkái.
Evttohus njuolggadussii
Ođđa láhkanjuolggadusevttohusa 1. paragráfas daddjo dainna lágiin maid mii jorgalat sámegillii čuovvovaččat:
«Fylkkamánni galgá, gitta viđa jahkái, mearridit bajimus boazologu juohke siidaoassái jus siiddas lassána boazolohku badjel mearriduvvon logu eambbo go 5 proseantta, eai ge ráhkat geahpedanplána, muhto fertejit čađahit gorrelogu unnideami.»
Nuppi paragráfas ges daddjo:
«Boazolohku siidaoassái mearriduvvo dan boazologus mii siidaoasis lei jagi ovdal go boazolohku lassánii bajábeallái mearriduvvon logu.»
Dan evttohusas lea departemeanta geavahan dakkár ovdamearkka, ahte ovtta siidaoasis ledje 300 heakka cuoŋománu 1. beaivvi, dalle siiddas lei boazolohku vuollel bajimus boazologu.
Siidaoassái dasto mearriduvvo alimus boazolohku 300 bohccui, jus orohagas dahje siiddas lassána nuppi jagi boazolohku badjel mearriduvvon logu.
(Ášši joatká vuolábealde gova)
Vuorkágovva: Inga Marie Guttorm
Ii ávki dušše rievdadit 60. paragráfa
Dálá lágas ii leat ge váldi mearridit boazologuid siidaosiide, muhto dušše orohagaide dahje siiddaide. Dat váldi lea dušše Boazodoallostivrras, ja dál evttoha ge stáhta alcces sirdit dan válddi.
NBR jođiheaddji Ellinor Marita Jåma ii loga iežas háliidit dál kommenteret maide departemeantta evttohussii.
– Mis leat leamaš guhkit áiggi proseassat dan ektui, nu ahte leaš oaidnit mo manná ihtá ráđđádallamiin. Dál sáhtán dušše dadjat ahte in oainne ávkki rievdadit 60. paragráfa. Mis lea riikačoahkkinmearrádus ahte olles boazodoalloláhka galgá geahčaduvvot. Muhto in hálit maide kommenteret ihtá ráđđádallama sisdoalus, dadjá Jåma.
(Ášši joatká gova vuolábealde)
Govven: Inga Marie Guttorm
Olles lága geahčadit
Sámedikki ráđđelahttu Thomas Åhrén iige hálit kommenteret ráđđádallamiid ja evttohusaid mat leat beavddis.
– Oaidnit dárbbu rievdadit 60. páragráfa, muhto seammás leat olles boazodoallolágas váilevašvuođat. Sámedikki oaidnu lea ahte áššit fertejit rivttes láhkai meannuduvvot maŋŋálaga. Jus galgá revideret lága, de ferte ollislaččat geahččat lága, lohká Åhrén.
Eai kommentere
Eanandoallo- ja biebmodepartemeanttas eai loga áigut kommenteret áššái.
– Čoahkkin dáhpáhuvvá virgeolbmodásis, nu ii leat vuos áigeguovdil jearahallat eanandoalloministara Sylvi Listhauga, čállet departemeanttas Ávvirii.
