-Almmuhus-
-Almmuhus-
OĐĐASAT Stággo­bivdi jođihiš­goahtá Deanu­čázá­daga Guolástan­háldda­husa 

Stággo­bivdi jođihiš­goahtá Deanu­čázá­daga Guolástan­háldda­husa 

-

-

Kárášjohkalaš John Nystad lea válljejuvvon Deanučázádaga guolástanhálddahusa goalmmát áigodaga ođđa jođiheaddjin. – Váre máhtášin hástaleaddji doaimma hálddašit, sávvá son.

Deanučázádaga Guolástanhálddahusa (DG) goalmmát áigodahkii, 2019-2023, leat ođđa stivrralahtut válljen kárášjohkalačča John Nystada ođđa jođiheaddjin vuosttaš guovtti jahkái.

– Dál lei gielddaid stággobivdiid vuorru ja jagi 2021:s galgá fierpmebivdi, nubbijođiheaddji Benn Larsen, ges jođihit DG. Dál lean vuosttaš johkagierragis ovddidit jođiheaddji namas daid beroštumiid mat johkagierraga guolásteamis lea.  Fertešin máhttit buriid evttohusaid – guldalit ja vuhtii váldit buohkaid oaiviliid. Váre máhtášin hástaleaddji doaimma hálddašit, sávvá Deanučázádaga Guolástanhálddahusa ođđa jođiheaddji, John Nystad.

DG GOALMMÁT ÁIGODAGA STIVRA: Gurot bealde: John Nystad (jođiheaddji), Steinar Pedersen, Reidar Varsi, Rune Aslaksen, Benn Larsen (nubbijođiheaddji), Solveig Boine Nikkinen, Dan Vidar Rasmus, Máret Guhttor ja  Asbjørn Guttorm. Govva: Deanučázádaga Guolástanhálddahus.
DG GOALMMÁT ÁIGODAGA STIVRA: Gurot bealde: John Nystad (jođiheaddji), Steinar Pedersen, Reidar Varsi, Rune Aslaksen, Benn Larsen (nubbijođiheaddji), Solveig Boine Nikkinen, Dan Vidar Rasmus, Máret Guhttor ja  Asbjørn Guttorm. Govva: Deanučázádaga Guolástanhálddahus.

Njealji jahkái

Deanučázádaga Guolástanhálddahusas leat ovcci lahtu. Sis geain lea fierpmebivdolohpi §3 mielde, válljejit vihtta áirasa oktasaš čoahkkimis. Kárášjoga ja Deanu gielddat válljejit guktot guokte lahtu oktan várrelahtuin stággobivdiid gaskkas geain eai leat vuoigatvuođat § 3 mielde. Helge Samuelsen lei vuosttaš jođiheaddji áigodaga 2011-2015, Steinar Pedersen ja Reidar Varsi leigga jođiheaddjit guokte jagi guktot áigodaga 2015-2019. 

Luossanálli Deanučázádagas

Nystad lohká su mielas easka dál, goalmmát áigodagas, lea DG sajáiduvvagoahtimin. 

– Go DG vuođđuduvai 2011:s, de árbiimet stuorra hástalusaid, earret eará ahte luossanálli lei njiedjagoahtán. Ollugat eai muitte ahte ovdal DG, de hálddašii Finnmárkku fylkkamánni Deanučázádaga. Dan birra in hálit dadjat maidege, muhto boađus lei ainge luossanálli njiejai, joatká John Nystad. 

Son čujuha ii leat dušše Deanus ahte uhcán luossa gorgŋe johkii, muhto lea seamma dilli miehtá Norgga. Nystad árvala ahte soaitá leat ábi nuoskkideapmi dahje biebmoluossarusttegiid lassáneapmi. Son lohká balddihahttin go eiseválddit dohkkehit ahte biebmoluossarusttegiin sáhttet 2-3 proseantta 400 000 000 biebmoluosas gargiiđit. 

– Dieđán ainge ahte johkaleagi álbmot berošta ahte luossanáli bisuhuvvošii ja buorránivččii, joatká Nystad ja lohká son diehtá ahte Deanuleagi badjegierraga olbmot dáhtošedje juoidá dahkot vai gođđoguolit lassánivčče. 

Áimmahuššat luossanáli ja álbmoga vuoigatvuođaid

DG ođđa jođiheaddji, Nystad, čilge DG bargu lea áimmahuššat sihke stággo- ja fierpmebivdiid vuoigatvuođaid.  Lohká DG lea olahan olu go lea nagodan geahpedit mearehis bivdokoartta vuovdima 11 000 kortii guktui beal rájá ja oanidit bivdoáigodaga. Čilge dutkit lohket easkka guokte luossabuolvva rájes, jagi 2031, oaidná lea go luossanáli dilli buorránan. Son ávžžuha olbmuid leat gierdevaččat.

DG nubbi váibmoášši lea Suoma beale bartaeaiggát vuoigatvuođa ášši. Lohká DG lea čállán sihke Birasdirektoráhttii ja departementii mas DG dovddaha stuorra vuostehágu go Suoma beale bartaeaiggádat leat ožžon vuoigatvuođaid mat leat gievrrabut go Norgga beale stággobivdiin. 

– Ii leat riekta vierrásiidda addit vuoigatvuođaid mat leat gievrrabut go Norgga beale stággobivdiid vuoigatvuođat.  Sii besset beallenuvttá suhkat Deanu ja gávppašit iežaset bivdokoarttaid earáide dan haddái maid háliidit. Leat lobiheamet geigen vuoigatvuođaid vierrásiidda, lohká John Nystad.

- Advertisement -
-Almmuhus-