-Almmuhus-
OĐĐASATStádaministtar galleda Sámedikki

Stádaministtar galleda Sámedikki

-

-

Boahtte vahkkus boahtá stádaministtar Erna Solberg Kárášjohkii, sutnje šaddá erenomáš čalmmustahttit konsultašuvdnašiehtadusa man ieš ovddidii logi jagi áigi «sámeministtarin».

Norgga fámoleamos nisu, Erna Solberg, lea máŋgii galledan Sámedikki. Muhto go boahtte vahkkus boahtá dievasčoahkkimii, de galleda Sámedikki ja Kárášjoga vuohččan stádaministtarin.

 – Mii illudit fas boahtit Finnmárkui ja dán vuoru maiddái Sámediggái, lohká stádaministtarkantuvrra stádačálli Sigbjørn Aanes.

 

Viimmat heivii

Ođđajagis 2014:s deaivvadeigga stádaministtar Erna Solberg ja sámediggepresideanta Aili Keskitalo Romssas. Dalle logai Solberg ahte háliidivččii fas boahtit galledit Sámedikki.

 – Lean hui ilus go viimmat heive boahtit. Jáhkkán ahte lea hui dehálaš ahte stádaministtar oahpásmuvvá vel buorebut sámepolitihkkii. Go son fitná Sámis, de dieđusge maiddái háliidit čájehit sutnje iežamet luonddu ja kultuvrra, lohká sámediggepresideanta Aili Keskitalo.

 

Čálus joatkkašuvvá gova vulobealde.

Sámediggepresideanta Aili Keskitalo illuda go stádaministtarii viimmat heive galledit Sámedikki. Vuorkágovva: Kila Anti

 

Čalmmustahttet konsultašuvdnasoahpamuša

Stádaministtar Erna Solberg boahtá Kárášjohkii maŋŋebárgga eahkeda ja čuovvu oasi Sámedikki dievasčoahkkimis gaskavahkku. Son doallá sártni Sámedikki sárdnestuolus ja čalmmustahttá ahte leat vássán logi jagi dan rájes go Sámediggi ja ráđđehus ásaheigga konsultašuvdnašiehtadusa. Dalle lei Solberg ráđđehusa «sámeministtar».

 – Son oinnii ieš dárbbu šiehtadussii ja čađahii barggu jođánit, dien dáfus lea soahpamuš hui persovnnalaš stádaministarii. Munno čoahkkimis logai maid diibmá ahte háliida ovddidit soahpamuša, lohká Keskitalo.

 

Vuordámušat

Konsultašuvdnasoahpamušas leamaš stuora váikkuhus sámepolitihkkii, dasa lassin lea dát váikkuhan Sámedikki ja ráđđehusa ovttasbargui.

 – Muhtumin lea gal nu ahte eat leat ovttaoaivilis mo geavahit soahpamuša. Mii leat gieskat leamaš oahpahusministtar luhtte ja dalle čielggadeimmet soahpama dieinna departemeanttain. Min dáhtu lea buoridit maiddái bušeahttavuogádaga ja sávan stádaministtar bargagoahtá dáinna, muitala sámediggepresideanta Aili Keskitalo.

 

Eaiggátvuođadovdu

Stádaministtar Erna Solbergas lea erenomáš oktavuohta konsultašuvdnasoahpamuššii Sámedikkiin, duođašta maiddái stádačálli.

 – Sutnje diehttelasat mearkkaša olu čalmmustahttit soahpamuša 10 jagi ávvudeami, sus lea áibbas erenomáš oktavuohta dása ja sus lea dasa eaiggátvuođadovdu go lei ministtarin justa dalle go soahpamuš šattai duohtan, lohká stádaministtarkantuvrra stádačálli Sigbjørn Aanes.

 

Davviguovllu ealáhusat dehálačča

Sámedikki galledeapmi lea váldooassin stádaministara prográmmas, muhto son váldá maiddái áiggi vuolgit fanasmátkái ja galledit Graveniid fitnodaga.

 – Lea mávssolaš oaidnit ja oahpásmuvvat ealáhusaide go ráđđehussii han lea Davviguovllu áŋgiruššan hui dehálaš. Mii diehtit maiddái ahte Davvi-Norgga ealáhusat ovdánit buorebut go ealáhusat muđui Norggas, loahpaha Aanes.

-Almmuhus-