-Almmuhus-
-Almmuhus-
KULTUVRA«Spirit in the sky» njunnošis sihke Spotifys ja Youtubes  – Dat lea...

«Spirit in the sky» njunnošis sihke Spotifys ja Youtubes  – Dat lea somá ja stuora deaddu

-

-

Mánnodaga čájehuvvui ahte lea KEiiNO joavku mii čuojahuvvo buot eanemusat Norgga Melodi Grand Prix lávlagiin, ja eará lávlagat leat olu unnit čuojahuvvon.

Dál čájehuvvo ahte KEiiNO lea čuojahuvvon buot eanemusat sihke Spotifys ja Youtubes. Lagabut 350 000 geardde lea «Spirit in the sky» čuojahuvvon, mii lea sullii 250 000 geardde eanet go Mørland, gii lea nubbin dan listtus.

– Dat lea somá. Leimmet hui gealdagasas movt dat šaddá min coctail-seaguhus. Veahá gal ballen go NRK prográmmajođiheaddji gohčodišgođii min lávlaga «gryterett», lohká Keiino joavkku ­juoigi ja lávlu, Fred René Buljo. 

 

Doalaha fokusa finála rádjái

Youtubes lea maid vierrun ahte muhtimat gehččet filmmaid ­dahje gullet lávlagiid, maid kommen­terejit.

– Lean gal oaidnán ovtta filmma youtubes, muhto in leat dađi bahábut vel šaddan guovlat daid. Ferten doalahit iežan fokusa njukčamánu 2. beaivvi guvlui, in ge geahča reakšuvnnaid ovdal, lohká Fred René. 

Son mieđiha gal ahte lea oaidnán sin badjin oddsas, ja ahte Eurovision Song Contest lei juohkán dan Norgga Spotify-listtu mas oidnojit man olu leat čuo­jahuvvon.

– Lean gullan ahte ii leat «Fairytale» rájes leamaš dakkár oiddot sihke rávdnjemis ja oddsas, lohká Fred René gii dál dovdá deattu.

 

Oddsoiddot

KEiiNO šattai oddsoiddohin jođánit maŋŋel go almmuhedje MGP-artisttaid geat galget Norgga ovddastit Israelas boahtte giđa Eurovision Song Contest lávlungilvvus mii lágiduvvo Tel Aviv gávpogis.

Dál čájehuvvo oddslisttus ahte buot Keiinos lea 39 proseantta vejolašvuohta vuoitit MGP finála Norggas, ja Mørland, gii lea nubbin oddslisttus, lea 14 pro­seantta vejolašvuohta vuoitit ­finála.

 

 

Ii loga sihkarin vuoitit

Eurovision Norway Facebook-­siiddus leat ollugat geat čállet guđe lávlagii liikojit buoremusat, ja Keiino namuhuvvo eanemusat.

– Ollugat čállet ahte Keiino lea sin oiddot vuoitit MGP finála, ­sihke Norggas ja olgoriikka fánssain. Muhto ii leat álo dat mii lea eanemusat čuojahuvvo Spotifys mii vuoitá, nu ahte duopmu ­čielgá easka njukčamánu 2. beaivvi, maŋŋel go buohkat leat lávlon, lohká Martin Fjellanger, gii stivre Eurovision Norway neahtta­siiddu.

-Almmuhus-