Lotteriijabearráigeahču diehtojuohkinkampánja čájeha ahte speallansorjjasvuođa sáhttá gomihit oapmahaččaid eallima oalát.
Lotteriijabearráigeahču Hjelpelinjen (veahkkelinjá) galggašii veahkehit sihke sin geat spellet ja sin oapmahaččaid geaid mielas speallan lea šaddan váttisvuohtan.
Dan bálvalusa neahttasiiddu oktavuođas, lea Lotteriija- og vuođđudusbearráigeahčču álggahan kampánjja mahkáš Finn-almmuhemiiguin main čájehit man duođalaš ášši lea.
– Speallansorjjasvuođas sáhttet leat stuorra psyhkalaš ja ruđalaš váikkuhusat sihke spelliide ja sin oapmahaččaide. Muhto dávjá vajálduhttit oapmahaččaid go hállat speallanváttisvuođaid birra. Mii háliidat veahkehit olbmuid geat lea gártan rossui, go muitalat gos veahkki lea olámuttos, lohká Lotteriijabearráigeahču direktevra Gunn Merete Paulsen.
Leat máŋga čuohteduháha oapmahačča. Norggas lea dál 34 000 spealli geain lea váttisvuohta ja 88 000 spealli leat riskaguovllus.
81 proseantta spelliin muitalit Hjelpelinjenii ahte sii ruhtadit speallama velggiin. Muhtun bearrašiidda manná nu funet ahte šaddet bákkus vuovdit sihke viesu ja biilla, vai besset eret fuones ruhtadilis maid speallan lea váikkuhan bearrašii.
