-Almmuhus-
KULTUVRASpeadjalastit mii dáhpáhuvvá álgoálbmotmáilmmis

Speadjalastit mii dáhpáhuvvá álgoálbmotmáilmmis

-

-

Riddu Riđđu festiválas ii leat dušše musihkka guovddážis. Sii loktejit máŋggabealatvuođa álgoálbmotmáilmmis, ja digaštallet hástalusaid mat leat Sámis ja eará álgoálbmogiin.

Dán jagi lea 26. háve go Riddu Riđđu lágiduvvo Gáivuonas. Prográmma lea dál almmuhuvvon, ja galgá speadjalastit mii dáhpáhuvvá álgoálbmotmáilmmis. Norgga dronnet Sonja rahpá festivála duorastaga suoidnemánu 13. beaivvi.

Riddu Riđđu áigu čalmmustahttit nuorra ja duostilis álgoálbmotdáiddáriid, ja dat galgá vuhttot sihke rahpamis, Riddu Sessionsas ja váldoartisttain.

– Dán jagáš dáiddalaš prográmma galgá áŋgiruššat ja illudit. Mii áigut sihkkarastit ahte Riddu Riđđu ain lea okta dain deháleamos deaivvadanbáikkiin boahtteáiggi álgoálbmotjienaide, ja ahte dáppe gilvit ovttasbargguid, lohká festiválahoavda Karoline Trollvik preassadieđáhusas.

 

– Dáiddalaš meašttirbargu

Komponista, jazzmusihkkár ja saksofonačuojaheaddji Mette-Henriette rahpankonsearta lea áibbas ođđa konsearta. Son gohčoduvvo musikálalaš sensašuvdnan, ja lea olu rámi ožžon Norggas ja olgoriikkas.

– Diŋgojuvvon konsearta man Mette-Henriette lea ráhkadan lea dáiddalaš meašttirbargu. Jáhkán dat rahpá čalmmiid, ja olbmo ipmárdusa sámi musihkkii. Lea historjjálaš dáhpáhus go dronnet Sonja rahpá festivála, ja Mette-Henriette vuolggaha dáiddalaš mátkki man geahččit besset vásihit festiválas, lohká festiválahoavda.

 

Guovssahasseminára jávohis sápmelačča birra

Festiválas galget maid guokte seminára, mii lea ovttasbargu Romssa universitehtain. Fáttát leat boazodoallu Alaskas ja kulturipmárdus čoavddan buoret dearvvašvuođabálvalusaide árktalaš guovlluin. Jahkásaš Guovssahassemináras jearrá psykologa Anne Lene Turi Dimpas manne sápmelaččat leat nu jávoheamet.

Son hupmá balu birra muitalit áššiid birra, ja ahte digitála áigi lea dagahan ahte sápmelaččat bivdet veahki ja leat eambbo rahpasat. Riddu Riđđu lokte maid Standing Rock digaštallama fas. Politihkkarat, ruhtadeaddjit ja álgoálbmotaktivisttat Sámis ja Davvi-Dakotas deaivvadit.

– Riddu Riđđu duostá áigeguovdilis áššiid váldit prográmmii. Guovssahasseminára lea jávohis sápmelačča birra, ja mii galgat čuvgehit Standing Rock ášši iešguđet beliin. Šaddet digaštallamat mat áŋgiruššet, lohká Karoline Trollvik.

 

«Morit Elena Morit!»

Riddu Riđu taleantaprográmma Riddu Sessions lea nuppi jagis. Dán jagáš dáiddárguovttos Anders Sunna ja Inga-Wiktoria Påve leaba ráhkadan animašuvdnafilmma, mas galgá vuosttaščájálmas festiválas. Filbma lea koloniserema birra, ja movt lea váikkuhan sámi. Filmma namma lea «Morit Elena Morit!»

-Almmuhus-