-Almmuhus-
SMÁVVAOĐĐASATSosiálalaš ja ekonomalaš erohusat lassánit

Sosiálalaš ja ekonomalaš erohusat lassánit

-

-

Ráđđehus bidjá johtui ekspeartajoavkku mii galgá geahččat mo mánáidgárddit, skuvllas ja SAÁF sáhttá veahkkin dásset sosiálalaš erohusaid mánáid gaskka.

Maŋemuš logi jagi leat Norggas lassánan sosiálalaš ja ekonomalaš erohusat. OECD oaivvilda ahte Norga ii leat buoremusaid iige heajumusaid searvvis vuosttildit erohusaid oahppovuogádagas.

Máhttoministtar Tonje Brenna (Bb) muitala preassadieđáhusas ahte eai dárbbaš nu stuora rievdadusat ovdal Norga lea buoret servodat, mas lea luohttámuš ja buohkain seamma vejolašvuođat.

– Dađi bahábut leat boasttu luottas dál. Erohusat lassánit, ja váhnemiid duogáš dávjá čuohcá mánáide, čilge Brenna.

Eambbo ja eambbo mánát bajásšaddet geafes bearrašis. Eambbo ja eambbo nuorat šaddet bargonávccaheapmin, ja olusat gahččet eret joatkkaskuvllain.

– Dán ovdáneami mii šaddat jorgalit. Čovdosat sáhttet leat mánáidgárddiin, skuvllain ja skuvllaid asttoáiggefálaldagain (SAÁF), oaivvilda Brenna.

Árbejit hástalusaid

Dutkamat čájehit ahte bearraša duogážis lea olu dadjamuš mo mánát birgejit skuvllas, ja jus váhnemiin ii leat oahppu ja unnán sisaboahtu, de čájehuvvo ahte mánát gurret váhnemiid luottaid dien dáfus.

– Mii áigut nannet barggu unnidit erohusaid skuvllain, mánáidgárddiin ja SAÁF:s, ja vuhtiiváldit buot mánáid. Mii fertet bissehit dan ahte mánát ožžot váhnemiid hástalusaid, ja sihkkarastit ahte buohkain leat seamma vejolašvuođat ceavzit skuvlla ja bargoeallima. Illudan gullat makkár evttohusat bohtet ekspeartajoavkkus.

-Almmuhus-