Sosiála mediain lea leavvagoahtán fáddágilkor #mundoarjjunjovssetante. Dan lea nuoraidorganisašuvdna Noereh álggagan. – Mii čájehit doarjaga Jovsset Ántii, ahte ii leat akto čuožžume áššis, lohká nubbijođiheaddji.
Noereh sámi nuoraidorganisašuvdna álggahii hástalusa sosiála mediain.
Sii hástalit olbmuid doarjut Jovsset Ante Sara ášši stáda vuostá, mii dál lea jođus Romssas, Hålogalándda Lágamánnirievttis.
Olusat leat čuovvolan Noereh hástalusa. Sihke Instagram ja Facebook sosiála mediaide leat ihtán olu govat, maidda leat bidjan fáddágilkora «Mun doarjjun Jovsset Ántte»
#mundoarjjunjovssetante
Noereh nubbijođiheaddji Anne Karen Sara mielas lea dehálaš doarjut Jovsset Ántte, ja sosiála mediaid bokte dan čájehit.
Son lohká dát lea dehálaš ášši, ii dušše Jovsset Ántii, muhto olles boazodollui.
– Son ii leat čuožžume akto dán áššis, ja mii čájehit doarjaga Jovsset Ántii ja eará boazodolliide. Dat lea váttisvuohta eará boazodolliide maid, geat leat seamma dilis, muhto eai leat lokten ášši diggevuogádahkii, lohká Anne Karen Sara.
(Ášši joatká gova vuolábealde)
Illuda go oallugat leat dorjon
Nubbijođiheaddji čilge ahte sii háliidedje áŋggirdahttit eará nuoraid dáinna hástalusain.
Son illuda go nu oallugat leat čuovvolan doarjut nuorra boazodoalli.
– Jáhkán dat mearkkaša olu sihke Jovsset Ántii ja eará boazodolliide geat leat seamma dilis. Boahttevaš buolvvaide maid mearkkaša olu. Lea buorre go olbmot leat lihkkagoahtán.
Son lohká áŋggirdeami čájehit ahte sápmelaččat leat okta álbmot, ja ahte olbmot dorjot sámi kultuvrra.
– Mii diehtit ahte sámi kultuvra ja giella ii livčče seamma jus ii livčče boazodoallu, mii lea issoras dehálaš. Erenoamážit dehálaš ahte boazodoallonuorat jotket doalahit sámi kultuvrra.
(Ášši joatká gova vuolábealde)
Anne Karen Sara lea ieš Romssas čuovvume dikki. Jovsset Ánte lea su nubbinvilbealli.
– Dat lea dehálaš ášši, ja livččen goit ge háliidit čuovvut vaikko ii livčče vilbealli. Mun háliidan gullat stáda ákkastemiid, ja mun čielgasit oainnán ahte dulbmot sápmelaččaid.
Noereh lei maid hástalan olbmuid čiŋadit gávttiin, čalmmustahttit Jovsset Ántte gičču stáda vuostá.
– Noereh áigu joatkit doarjumiin. Mii leat sámi nuoraid organisašuvdna, ja mii háliidit loktet sámi nuoraid áššiid, loahpaha Noereh nubbijođiheaddji.
– Eahperehálaš ášši
Okta guhte čiŋadii gávttiin, ja almmuhii gova fáddágilkoriin, lea neavttár Sarakka Gaup.
Son muitala ahte son áŋgiruššá álgoálbmotrivttiin, ja danne lea sutnje dehálaš doarjut dán ášši.
– Mun doarjjun Jovsset Ántte go mu mielas son lea duostilis boazobargi. Mu mielas lea su ášši eahpevuoiggalaš, lohká Sarakka Gaup.
(Ášši joatká gova vuolábealde)
Sus leat fuolkkit Guovdageainnus, guđet maid leat boazodoallit. Gaup muitala ahte son jurddaša sin birra maid dán áššis.
– Jurddašan ahte livččii váivi jus mu čeziide ja ednuide livččii seamma ládje dáhpáhuvvan. Lea dehálaš ahte mii sápmelaččat čuožžut ovttas dákkár áššiin, lohká son.
Ii lean vuordán
Jovsset Ánte Sara lea ieš oaidnán áŋgiruššama sosiála mediain.
– In lean vuordán dákkár doarjaga, muhto oainnán olbmot lea álgán fuomášit ášši. Olbmot oidnet Norgga stáhta badjel bávtti stivregoahtán sápmelaččaid. Eai váldde vuhtii sápmelaččaid árbevieruid ja oaiviliid mo ealáhus galgá ovdánit ja leahkit.
