Leaba Máret Álehttá E. Kildedam ja Inger Elisabeth Utsi evttohan kárášjohkalačča Ronny Persena Ávvira juovlafuomášumi árgabeaisáŋgárin.
– Mun sávan ahte min spábbačiekčannieiddaid hárjeheaddji oččošii fuomášumi. Son nu viššalit ja čehpet hárjehallá min mánáid, ja lea juo ollu jagiid bargan dan, ákkastallá Máret Álehttá E. Kildedam.
Máret Álehtáin lea ge ovttaoaivilis Inger Elisabeth Utsi.
– Mu mielas ánssáša Ronny Persen Kárášjogas juovlafuomášumi go nu ollu diimmuid iežas priváhta eallimis bidjá justa hárjehallat Ávju nieiddaid spábbačiekčamis, dadjá son.
Son lasiha: – Álot buriin mielain jođiha hárjehallamiid dahje čiekčamiid mii addá fas nu ollu ilu ruovttoluotta min mánáide, loahpaha Utsi.
Hávski ja somá lea
Ronny Persen lea barggus Kárášjoga nuoraidskuvllas go Ávvir váldá suinna oktavuođa ja muitala mii lea duogáš dasa.
– Dat lea hávski, hirpmástuhtti ja somá, dadjá Ronny Persen.
Son atná árvvus go su leat nammadan árgabeaisáŋgárin.
– Dat ahte muitet min geat atnit veaháš áiggi nieiddaid hárjehallamiidda lea somá ja fiinnis.
Iežas mánáid dihte
Persen lea máŋga jagi bargan Ávjju nieiddaid spábbačiekčanjoavkku hárjeheaddjin. Son ieš ii muitte galle jagi lea jo dan dahkan.
– Čieža dahje gávcci jagi gal lean bargan, movttain muitala son.
Ronny čilge ahte dat ii lean soaittáhagas dahku.
– Mu nieiddat leaba mánáidgárdde rájes čiekčan spáppa. Mun lean čuvvon sudno das rájes. Nu ahte álkit dadjat de lean sudno bokte bidjan nu olu áiggi nieiddaid hárjehallamiidda.
– Gievrrabut go ovdal
Kárášjogas leat guhká leamaš guokte sierra spábbačiekčanvaláštallansearvvi, nu go Ávju ja Nordlys. Dál báhcá dušše Nordlysa searvi.
– Ávjju nieiddat čikče bures ovdamearkka dihte Álttáturneringas. Sii leat šaddame hui buorit, lohká Ronny Persen.
Muhto Ávju nieiddaid spábbačiekčanjoavku ii leat šat.
– Mii oaidnit ovdamunnin das go lea okta eai ge guokte searvvi gilis danne go jávká dárbu gilvalit ruhtadeddjiid alde. Muhto deháleamos lea ahte ovttas mii sáhttit leat mihá gievrrabut go ovdal, dadjá son.
– Juovlasávaldat?
Persen lohká ahte ii leat vuos jurddašan juovlasávaldagaid birra obbalaččat. Muhto maŋŋá oanehis bottu lohká ná:
– Gávdnat hárjeheddjiid maŋimuš áiggiid lea váddáset go ovdal. Mun oainnán ahte muhtin joavkkuin eai leat hárjeheaddjit. Danin go olbmot smihttet sis ii leat gealbu. Muhto dat ii leat nu váttis. Nu ahte mun sávan eambbosiid geahččalit leat hárjeheaddjin, mojiin loahpaha Ronny Persen.
Juovlamánu geiget mii Ávviris juovlafuomášumi olbmuide geat ánssášit liigefuomášumi barggu ovddas maid dahket illun earáide. Cavgil midjiide gii ánssášivččii juovlafuomášumi. Čális e-poastta post@avvir.no. Čális oanehaččat manne juste dat olmmoš ánssášivčče juovlafuomášumi.
