-Almmuhus-
-Almmuhus-
OĐĐASATSon lea vási­han ahte barttat eai bálle ráfis, ja dál lea okta...

Son lea vási­han ahte barttat eai bálle ráfis, ja dál lea okta barta buollán gutnan

-

-

Nils Thomas Utsi lea maŋemuš jagi vásihan ahte barttat eai bálle ráfis, ja dál lea okta barta buollán gutnan.

Skilleduorastaga iđida vuoddjái Nils Thomas Utsi iežas bartii doalvut diŋggaid. Go bođii báikái, de fuomášii ahte barta lea buollán gutnan. Barta lea Vuohcetjávrris Guovdageainnu suohkanis, njeallje miilla eret biillaluottas,  iige son loga rabas láhtu guvlui.

– Imaštan manne bullii, ii mus galgan doppe mii galgá bullehit.  Dan in ipmir, ja lea guokte vejolašvuođa, ahte muhtun lea cahkkehan dahje ahte lea dáhpedorpmis geavvan. Ii leat oktage muitalan munnje maidige, de in dieđe šat eambbo. Olles barta lea buollán gutnan, dadjá Nils Thomas Utsi. 

IMAŠTA: Nils Thomas Utsi imašta mot su barta sáhtii buollit. Vuorkágovva: May Britt Utsi
IMAŠTA: Nils Thomas Utsi imašta mot su barta sáhtii buollit. Vuorkágovva: May Britt Utsi

 Nils Thomas Utsi muitala ahte son lea vásihan maŋemuš jagi ahte barttat eai bálle ráfis, ja diimmá geasi lei muhtin geahččalan gáikut sisa boares bartii. 

– Mus ledje guokte bartta báikkis, ja ođđa barta lea dál buollán gutnan.

Dolvon biergasiid

Utsi lohká ovdal vásihan ahte gii nu lea geahččalan gaikkodit barta ja mohtorsaháin geahččalan beassat bartta sisa. 

«–Lean gal garrasit čuoččuhan ahte meahccebáikkiin lea sajáiduvvan rievttit, muhto in dieđe lea go oktage suhttan dan geažil»

Nils Thomas Utsi

– Ledje uvssa gaikon ja dolvon diŋggaid. Čakčat fas ledje sahán rabas aggregáhta uvssa. In dieđe mii dáhpáhuvvá ja lea veaháš ártet. Lean gal garrasit čuoččuhan ahte meahccebáikkiin lea sajáiduvvan rievttit, muhto in dieđe lea go oktage suhttan dan geažil, dadjá Utsi. 

Dieđihan politiijai

Son lea dieđihan dáhpáhusa sihke dáhkádusfitnodahkii ja politiijaide. 

– Ožžon dieđu politiijas ahte sii eai dáidde sáhttit maidige dahkat, eai ge áigon gal vuolgit guorahallat. Soaitá dáhkádusfitnodat dan bargat, ja lean gal hástán sin boahtit, dadjá Nils Thomas Utsi.

Son ii loga vel ožžon dieđu dáhkádusfitnodagas maid barget áššiin. 

Ávvir lea geahččalan oažžut kommentara politiijain, muhto eat leat lihkostuvvan.

Gozihit guovlu 

Dál son árvvoštallá cegget govvenapparáhtaid báikái, go biergasat ja barttat eai bálle ráfis. 

– Ferten gal vissa bidjat govvenapparáhtaid iežan bivdoguvlui, go juo leat álgán oalát billistit diŋggaid. Dál gal leat ge diekkárat mat sáddestit govaid dan seammás go oidnet maide lihkkaseame. Dál in dieđe eará ráđi go diŋgot juo valjit diekkáriid, lohká son,

Ballá ahte nubbi barta maid buollá

Sus lea vel  boares barta seamma sajis, ja lohká dál balahit dan bartta buollámis, vaikko diehtá ii doppe ge leat mihkkige mii iešalddis galgá sáhttit buollát.

–  Ártet gal lea go ovttas ge livččii mihkke ákkaid vaháguhttit min, go mis lei juo diet barta mii bulii leamaš doppe badjel 30 jagi. Boares barta lea leamaš olu guhkit, dadjá Nils Thomas Utsi.

Ođđa bartta huksii Nils Thomas Utsi  1990:s, ja boares bartta lea son oastán ii ge dieđe man guhká dat lea leamašan.  

-Almmuhus-