-Almmuhus-
GUOIMMUHEAPMI– Son lea liekkus ja stáđis, ja oažžu jođánit luohttevaš­vuođa min servo­daga nuora­musain

– Son lea liekkus ja stáđis, ja oažžu jođánit luohttevaš­vuođa min servo­daga nuora­musain

-

-

Guovdageainnu searvegotti pedagoga Ellen Aina Eira lea jođus Mázii go Ávvir váldá suinna oktavuođa, doppe son galgá deaivvadit 4-jahkásaččaiguin geat galget girkogirjji oažžut vahkkoloahpas. 

– Ellen Aina Eira ánssáša juovlafuomášumi dan buori barggu ovddas maid son bargá girkus, erenoamážiid mánáid ja nuoraid váras. Son lea liekkus ja stáđis, ja oažžu jođánit luohttevašvuođa min servodaga nuoramusain, čállá Elle Sara M. Pulk gii árvala ahte Ellen Aina galgá oažžut lassi fuomášumi ovdal juovllaid. 

Ellen Sara M. Pulk muitala maid ahte dávjá gullo rápmi Ellen Ainai dan buori barggu ovddas man son doaimmaha, erenoamážit konfirmánttaid ja sin váhnemiid ektui. 

– Sis lean oba ollu buori gullan Ellen Aina birra, čállá Elle Sara M. Pulk. 

4-jahkásaččaid girkogirji

– Ovddit sotnabeaivvi lei Ipmilbálvalus gos 4-jahkásaččat ožžo Mu girkogirjji. Lei nu fiinna Ipmilbálvalus. Mánát vázze ráidun girku sisa go Ipmilbálvalus álggi. Doppe besse muitalusa gullát Jesusa birra. Lei hávski sihke mánáide ja rávisolbmuide, ja dat dovdo bures ahte girkus lea sadji buohkaide, čállá Elle Sara M. Pulk.

Ja Ellen Aina lea ge juste jođus Mázii go Ávvir váldá suinna oktavuođa. Son galgá deaivvadit 4-jahkásaččaiguin geat doppe galget oažžut «Mu girkogirjji» dán vahkkoloahpa. 

– Šoš, oba somá gullat go Elle Sara lea mu evttohan ja nie čállán mu ja mu barggu birra, movttáska Ellen Aina Eira go Ávvir lohká sutnje jitnosit maid Elle Sara M. Pulk lea čállán evttohusas. 

Bargan ollu eaktodáhtolašbargguid

Ellen Aina lea oahppan oahpaheaddji gii maŋemus 19 jagi lea bargan Sámedikkis. Son váillahišgođii oahpaheaddjebarggu. Go de rahpasii virgi katekehtan dahje searvegotti pedagogan, de son ozai ja oaččui maid dan virggi. Bargat girkus ii lean amas Ellen Ainai go lea bargan eaktodáhtolašbargguid doppe ovdal ge. 

– Dalle go mus alddán lei mánná dien agis, de lean sihke sotnabeaiskuvllas ja maid eará eaktodáhtolašbargguid bargan girkus. Jurddašin ahte dá lea dakkár bargu mas loavttán ja mun liikon ge hui bures iežan bargui. Lea hui somá hutkat mo geasuhit mánáid ja nuoraid girkui, go sii han leat min boahtteáigi, dadjá Ellen Aina. 

Vuohttá ahte mánát liikojit

Ellen Aina lohka ahte dat duođaid ligge gullat ahte olbmot atnet árvvus barggu man bargá, ja lohká vuohttit mánáin ahte sii liikojit beassat leat guovddážis ja báitit. 

– Duođašta ahte lean lihkostuvvan ja ahte olahan nuoraide. Diimmá konfirmánttat maid leat munnje dadjan ahte sii váillahit konfirmántaoahpahusa, ja dat lea somá gullat, muitala Ellen Aina. 

– Somá ahte olbmot, ja erenoamážit sii geain leat mánát, oidnet ahte girkus lea buohkaide sadji. Ja go mii vuos bovdet mánáid ipmilbálvalussii, de gal fertet heivehit maid sidjiide dan, dadjá son.  

-Almmuhus-