– Son lea dakkár dábálaš badjeolmmoš gii ferte máhttit vaikke maid

Namma: Katri Sarak Somby
Ahki: 42
Guovlu: Sirbmá
Bargu: Sámebyråkráhta

1. Gos eallá koalaguovža?

— Na, ii go son dat leat mii eallá Austrálias? Dan mun vástidan. RIEKTA!

2. Manne lea golggotmánu 9.beaivi sámi leavgabeaivi?

— Na dat lea Suoma riikabeaivvi rahpan! Ii, Suoma Sámedikki? Na Norgga Sámedikki rahpan, nu dat lea, lohká son ja boagusta. RIEKTA!
 

3. Mo álgá Sámi soga lávlla (njeallje vuosttaš sáni)?

— Dien gal dieđán: Guhkkin dávggáid … Ii, Guhkkin davvin dávggáid vuolde. RIEKTA!

Katri Somby máhtii visot golbma gažaldaga, ja son de oažžu liigegažaldagaid. Son sáhttá válljet ruoná liigegažaldaga mii addá 1 čuoggá, dahje válljet rukses gažaldaga mii addá 3 čuoggá.

Somby válljii rukses liigegažaldaga:

1. liigegažaldat: Goas almmustuvai vuosttaš geardde biibbal sámegilli?

— Na dat gal lea 1895:s. RIEKTA!

Son máhtii liigegažaldaga, ja oažžu nuppi liigegažaldaga. Son vállje fas rukses gažaldaga.

2. liigegažaldat: Mii lea stuorimus njuorju?

— Na lea go son morša. Lea go dat njuorju? mun dajan morša. BOASTUT!

Rievttes vástádus: Mearraelefántta, sáhttá deaddit 4 000 kilo.

Somby máhtii visot golbma álgo gažaldaga, ja vel nuppi liigegažaldaga. Son beassá liikká válljet árvalusaid maiguin sáhttá fasket 5,10, dahje 15 čuoggá. Dat lea dan duohken makkár ivnni vállje. Jus vástida riekta de oažžu: Rukses árvalus lea váddáseamos ja das oažžu 15 čuoggá, alit árvalusas 10 čuoggá, ja ruonás fas 5 čuoggá.

Somby lohká iežas fertet válljet dan nubbin váddáseamos ivnni, ja vállje aliha.

Mii dat lea mii šaddá alladit, muhto ii unno goassege?

 ­— Hmmm, mii son dat lea? Sáhttá nu olu. Mun vástidan muorra!

Rivttes vástádus: Ahki.
 

Galle čuoggá oktiibuot: 6 čuoggá
 

Juohke gilvaleaddji beassá hástalit ođđa gilvaleaddji Ávvira geassegilvui.

 — Mun hástalan iežas kránnjá, Nancy. Son lea dakkár dábálaš badjeolmmoš gii ferte ­máhttit vaikke maid, jáhkán son heive dákkár gilvui, lohká Katri Somby.

_{Njunnošis: Lemet Ánde Stueng 16 čuoggá}

^{Geassegilvu lea maiddái deaddiluvvon lávvordat báberaviisii.}