Ávvir lea dáhtton olbmuid sáddet evttohusaid geaidda galggašii addot veaháš fuomášupmi. Dalle čáliimet ahte ohcat olbmo gii buktá moji ja ilu, juogo bargosajis dahje astoáiggis. Mii ozaimet árgabeaisáŋgára.
– Mii gal dovdat dakkár olbmo. Su namma lea Anna Margrethe Bæhr Hætta.
Ná čállet Guovdageainnu skuvlla oahpaheaddjit iežaset hoavdda ja skuvlla rektora birra.
– Son lea dat gullon beaivesuonjar! Álo moddjáme, álo positiiva.
Ávvir fitná Anna Margrethe luhtte, geigeme fuomášumi maid su mielbargit oaivvildit ahte son ánssaša.
Buohkaide galggašii skeaŋkkaš
– Oi, wow! Oba somá, in lean vuordán veaháš ge, moddjesta son.
Beaivválaččat son bargá Guovdageainnu skuvlla rektorin, ja dál leatge doama doama ráhkkaneame visot bargguide mat gullet go galgá ođđa skuvlii fárret.
Son ganjalda go Ávvir lohká maid su mielbargit leat čállán su birra ja sáhttá muitalit ahte sii maid ánssášivčče dakkár fuomášumi. Sii leat ovttas bargan gaskaboddosaš skuvllain ja birgehallet ovttas vaikke sáhttá leat moivvas ja gárži.
– Mun in láve gal ná (ganjaldit), muhto oba somá go sii leat fuobmán dán, muitala son ovdal go sihkesta gatnjaliid ja reaškkiha.
Ráhkkaneame juovllaide
Anna Margrethe sáhttá muitalit ahte sii leat skuvllas olles leavttuin ráhkkaneame juovllaide. Klássalanjain oidnojit násttit glásain, muhtimat leat ráhkadan liigečiŋaid ja earát ges leat láibon ja geahččan juovlafilmmaid.
Rektor lea viežžan muora, ja dáhtton garraduoji oahpaheaddji ja ohppiid ráhkadit juolggi dasa vai bissu čuožžut.
– Dan mii áigut bidjat olggobeallai skuvlla, ja čuovggaid vel ohcat dasa. Maŋemuš skuvlabeaivvi mii čoahkkanit olles skuvla olggos, vázzit muora birra ja lávlut. Jáhkán dat lea hui buorre vuohki loahpahit dán jagi, čilge son.
