-Almmuhus-
OĐĐASAT Son han lea sápmelaš gii galgá málestit Sámi álbmot­beaivvi

Son han lea sápmelaš gii galgá málestit Sámi álbmot­beaivvi

-

-

Jurddašit go ahte lea dáčča, Kokkejævel, gii galgá málestit sámi biepmuid teves sámi álbmotbeaivvi? De gal leat vearrut jurddašan. Son lea sápmelaš.

Ášši lea divvojuvvon maŋŋel almmuheami. Áššis lei sitáhta maid Sandøy ii mieđit iežas dadjan jearahallama oktavuođas. Dat sitáhta lea sihkkojuvvon.  

.Asbjørn Sandøy gohčoda iežas «Kokkejævel», ja lea juo máŋga jagi guoimmuhan ja rahppasit muitalan iežas eallima stuora ja unnit vásáhusažiid iežas Facebook-siiddus. Son šattai dovddusin miehta Norgga maŋŋel go álggahii blogga, ja dál lea blogga okta eanemus lohkkon bloggain Norggas. Son lea maid evttohuvvon Vixen Awards blogga-bálkkašumiide ja lea čállime iežas girjji.  Dál lean son bovdejuvvon ráhkadit sámi mállet biepmu Tv njuolggosáddagis Sámi Álbmotbeaivvi. 

– Sii leat áigá juo váldán oktavuođa, ovdal álgen blogget. Ovddit vahkku easkka duođastuvvui šiehtadus. De lea njuolggosátta Romssas, gos galgá stuora showa leat. Dat šaddá somá, illuda Sandøy. Son ii loga vel nu ollu plánen maid áigu ráhkadit.

Ii plánen vel

– Mii galgat ráhkadit sámi biepmu, maid lea álki ráhkadit ja masá álkit liikot. Lean veaháš eahpesihkar movt dat lea plánejuvvon. Mun galggan ovtta ládje dego guossegoahkka lea, ja galgat ovtta guossohanbáikkis ráhkadit biepmu. Dat lea dakkár unna pizzabáikkážis, mii ii dábálaččat guossot sámi biepmu, muitala Sandøy gii lea ieš maid sápmelaš.

– Mu áhkku lei Deanus eret ja son lei olles sápmelaš. Mu eadni lei de beallesápmelaš, ja mun ges de njealjehassápmelaš. Mu áhčči ges lei mearrasápmelaš Viestterállasis eret. Nu ahte mus leat oalle ollu sámi máttut, dadjá Sandøy gii lea rámis leat sápmelaš.

Hállu oahppat sámastit

Son ii huma sámegiela, muhto lea máŋga jagi jurddašan oahppat sámegiela.

– Dađi bahábut in leat nu giellačeahppi. In ceavzán duiskkagielas, ja in jáhke šaddat beare čeahppi sámegielas ge. Livčče gal somá oahppat muhtun sániid, nagodit gulahallat dahje juobe ipmirdit maid dii dadjabehtet go hupmabehtet sámegiela. Dan gal lean jurddašan máŋgii, muhto dat ii šatta dán jagi gal, dadjá Sandøy.

- Advertisement -
-Almmuhus-